Tura, Nailur:
Ka Meghalaya Pradesh Youth Congress (MPYC) ka la ther tyngeh halor ka jingkren ba dang shen jong u Myntri Rangbah ka Jylla, u Conrad K. Sangma ha kaba u la ong ba ka jingïakhih kaba dang ïaid mynta jong ki nongtrei (non-gazetted) ka GHADC ka long kaei-kaei kaba ka Council da lade ka donkam ban pynbeit naba ka jingtreikam jong ka, ka long laitluid na ka Jylla.
Ki nongtrei ka GHADC ki la bteng ïa ka jingïakhih la kumba ar taïew mynta namar ka jingbym pat siew ïa ka tulop kaba la palat 35 bnai, kumjuh ka jingpynslem haba ïadei bad ka jingpyntreikam ïa ka ‘5th Pay Commission’ ha GHADC wat hapdeng kiba bun ki jingkular lyngba ki jingthoh na ka Sorkar Jylla bad ka Council kumjuh.
“Kane mynta ka la long ka jingkhuslai kaba khraw na bynta baroh ki nongshong shnong ka Ri-lum Garo. Ka paw shai ba ka jinglong-jingman ka pla tyngka jong ka GHADC ka la nang sniew shuh-shuh bad ki dang don shuh ki mawjynthut kiba hap ban jop. Napdeng ki 17 tylli ki tnad treikam kiba pynwandur ïa ka GHADC, ki tnad treikam kum ka tnad khlaw, Land & Revenue, Justice & Civil Works ki long kiba kham hakhmat kiba wanrah khajna na bynta ka Council,” ong u Vice President ka MPYC, u Timjim.
U la pynsngew ba ka long kaba donkam ïa ki dkhot ban long kiba khuid bad suba haba ïadei bad ki jingïadei ban jop ïa kane ka jingeh, hynrei kumba ka long, ka GHADC la slem bah la bna halor ka jingbamsap bad ka jingpynlut phut, ha kawei ka liang kaba la ktah shi kat dei ïa ka rukom treikam.
“Ka jingbun nongtrei palat ka Council ka long ka jingmih namar ka bamsap kaba la nang wanrah shuh-shuh ki jingeh. Nalor kane, ka shlem treikam ka don ïa ki jingdon-jingem kiba la sdang ban tlor bad kam biang ha ka liang ki kyndon ka pisa-tyngka, ‘Service Rules’, nalor kiwei-kiwei kiba donkam ban pynthymmai. Ka jingkhmih bniah ka long ba kine kiei-kiei baroh ki dei namar ki jingduna jong ka Sorkar MDA bad ka EC hapoh ka jingïalam ka NPP hapoh Council,” pynpaw utei u samla nongïalam.
Ïa ka GHADC la synshar da ka EC hapoh ka jingïalam ka NPP la bun-bun snem. Kiba kum kine ki jinglong-jingman lah ban kiar lada ki trei hok bad shimkhia ïa ka kam. Ha kawei ka liang, kim shym la pyrshang ban pynbha ïa ka Council, bad ka la nang hiar arsut.
Ki nongshong shnong ka Ri-lum Garo ki la ai ka rai ha ka Sorkar NPP ban pynïaid ïa ka GHADC ha ka rukom ba kham bha, hynrei kumba ka long, ka la nang pynsniew dur pynban ïa ka jinglong-jingman.
Halor ka jingbym shimkhia jong ka Sorkar Jylla ban tuklar halor katei ka bynta, u Timjim u la pynkynmaw ïa ki nongïalam ka NPP kumjuh ïa u Myntri Rangbah ha kaba ha ka jingïaid lynti ba ha shuwa jong ki ilekshon sha ka GHADC, ki la ong ba ka Jylla bad ka Sorkar Pdeng ki long kiba donkam na bynta ka Council ban treikam bha bad tang ka NPP, kum ka seng kaba synshar ïa ka Sorkar Jylla, ka la don ka jinglah ban pynkylla shibun ïa ka jinglong-jingman.
“Naba ka NPP mynta ka synshar ïa ka Jylla bad Council da ki snem, ka jingkren ba dang shen jong u Myntri Rangbah ba ka GHADC ka dei ka ‘Autonomous Body’ bad ba ka Sorkar Jylla kam don jingkitkhlieh halor ka jinglong-jingman ba mynta, ka pyni ïa ka jingbym lah jong ki ban pynïaid bad ka jingpynbiej ïa ka jaidbynriew Garo na bynta ka ilekshon,” kynnoh u Timjim.
Utei u nongïalam ka MPYC lyngba ka kyrwoh jong u, u la kyrpad ïa u Myntri Rangbah ban shim ka jingkitkhlieh bad ka sienjam ban tuklar halor kane ka bynta.
