Nongstoiñ, Nailur 10
Ki paidbah nongshong shnong jong 21 tylli ki shnong kiba hap hapoh lai tylli ki Polling Station (PS) ba kynthup ïa ka Misei, Langdongdai bad Mawsmai Polling Station ki la shim ïa ka rai ba kin ym ïa shim bynta ha ka ilekshon MDC ban wan lada na ka liang ka KHADC bad ka Select Committee ba la khlieh da u Bah PN Syiem kum u Chairman kam sngap ïa ka sur jong 21 tylli ki shnong.
Kane ka sur ka la mih ha ka Sngi Ba-ar jong ka taïew ha ka jingïalang paidbah jong ka JAC ki lai Polling Station ïa kaba la pynlong ha ka shnong Langdongdai na ka bynta ka jingdawa pyrshah ïa ka jingpynhap jubor ïa ki 21 tylli ki shnong ba hap ha ki lai tylli ki PS sha Rambrai Jyrngam Constituency na Mawshynrut Constituency na ka bynta ka ilekshon MDC ban wan.
Shuh shuh ha kane ka jingïalang, ka sur jong ki paidbah na 21 tylli ki shnong ba hap ha ki lai PS, ki la ïeng triang ban pyrshah jur ïa ka jingpynhap jubor da ka Select Committee khlem da sngap ïa ka sur ki paidbah lyngba ka Delimitation Committee.
Ha kane ka jingïalang la kyrshan ruh da kiba bun ki rangbah shnong, ki longkmie, ki samla bad ki seng jong ka thaiñ Nongtrai kiba hap ha ki 21 tylli ki shnong kiba la pyrshah jur ïa kane ka rai jong ka Select Committee. Ki la dawa ban pynphai biang ïa ki 21 tylli ki shnong ba la pynhap jubor sha ka Mawshynrut Constituency lym kumta nangne shakhmat yn nang kham pynjur shuh shuh ïa ki jingïakhih.
