Shillong, Nailur 10
U Saleng A Sangma uba dei u MP na Tura, hadien ba u la shah thung dang shen kum u dkhot ka Governing Council, ha ka Lah Sngi U Blei u la leit ban jngoh ïa ka North Eastern Indira Gandhi Regional Institute of Health and Medical Sciences (NEIGRIHMS) ha Mawdiangdiang.
Ha kane ka sngi u Saleng u la lum ruh ïa ka jingïalang na ka bynta ban tip shai halor ka jinglong jingman jong ka NEIGRIHMS kaba dei kawei na ki jaka ai jingsumar ka Sorkar Kmie kaba ai jingshakri ïa ki nongshong shnong ka thaiñ Shatei Lam-Mihngi baroh kawei.
Ha kane ka jingïakynduh, la ïoh ruh ban ïakren bad ki doktor bad ki nongtrei na ki tnat bapher bapher jong ka NEIGRIHMS, ha kaba u MP u la pynpaw ïa ka jingkmen ban ong ba ka jingthmu jong ka jingleit jngoh ka long ban sngewthuh shai halor ki mat bapher bapher kiba ktah ïa ka NEIGRIHMS.
“Lyngba kane ka jingtip, ngan sa ïoh ban rah ïa ki mat sha ka sorkar pdeng ban pynthikna ba ka NEIGRIHMS kan kylla long kum ka jaka ai jingsumar kaba paka kaba don ha ka kyrdan kaba hajrong ban ai jingshakri ïa ki paidbah ka thaiñ Shatei Lam-Mihngi baroh kawei,” la ong u Saleng.
Shuh shuh ha ka jingïalang, u la ong ba un sa lum ïa ka jingïakynduh lang bad baroh ki MP ka thaiñ Shatei Lam-Mihngi khlem da kheiñ ïa ka seng saiñ pyrthei kaba ki don hynrei ban ïarap ban pynbeit ïa ki kynrum-kynram kiba kongsan ha NEIGRIHMS, namar ba kane ka jaka ai jingsumar ka long kaba kongsan bha ha ka thain?.
U Saleng u la ong ba un sa shimkhia mardor ïa kane ka kam namar ka thaiñ baroh kawei ka phaikhmat sha ka NEIGRIHMS ba ka dei ka hospital kaba bha tam bad ka jaka ai jinghikai ha ka thaiñ.
U Director ka NEIGRIHMS u Prof Nalin Mehta u la pynpaw hakhmat u MP halor ki jingdonkam ba hakhmat jong ka NEIGRIHMS kaba kynthup ïa ka jingduna ha ka jingdon ki doctor, ka jingsahteng kaba la slem ha ka ban khmih bniah ïa ki Cadre, ban rah ïa ka kyrdan kaba ïa ryngkat bad ka AIIMS New Delhi bad PGIMER, Chandigarh bad ka jingdonkam ïa ka jaka ban shna ïa ka Guest House na ka bynta ka jingdonkam ki nongpang.
U la ban jur ruh ïa ka jingdonkam ban ai ïa ka kyrdan Institute of National Importance (INI) ïa ka NEIGRIHMS ban ïarap ha ka ban weng ïa ki jingeh.
Halor kane, u MP u la kyntu ïa ki nongpynïaid bad ïa ki doctor ba kin ai da ka jingthoh kaba bniah halor ki jingdonkam khnang ba un lah ban shimkhia ha ka ban lah ban pynbeit noh mardor.
U la pynthikna ruh ba yn rah ruh ïa ka jingkyrpad ka NEIGRIHMS na ka bynta ban ïoh ïa ka jaka ban tei ïa ka Guest House na ka bynta ki nongpang hajan ka NEIGRIHMS, namar kane kan long ka jingïarap kaba khraw ïa ki nongpang kiba wan na ki jaka kiba jngai ban ïoh jingsumar.
