Shillong, Nailur 11
U Superintendent of Police (Traffic) ka East Khasi Hills u K Prasad u la kyntu ïa baroh ki nongñiah kali, kata ki saw shaka bad ar shaka ba kin bud ryntih ïa ki kyndon ba la buh khnang ba kan ym pynwit ïa ka leit ka wan bad ruh ban wanrah ka jingshngaiñ ïa ki nongleit nongwan.
Ha ka kyrwoh khubor kaba la pyllait, u Prasad u la ong ba wat la na ka liang ka tnat pynïaid kali ka la dep ban ai jingtip bad ai jingmut, hynrei ki kali, kata ki saw shaka bad ar shaka ki dang mar-mlien ban ïaid ne shim ‘pass’ na ka liang kadiang jong ka surok khlem da pynneh ïa ka lane kaba ki ïaid kaba pynlong pat ban buh jingma ïa kiwei pat kiba pyndonkam ïa ka surok, khamtam ki nongleit nongwan kiba kiew kali ne hiar. U SP (Traffic) u la pyntip ruh ba nalor kane, ki don sa ki kali kiba pynïeng thurmur bad pathar bad kham bunsien ha ki jaka ‘No Parking’ ne bym shah ïeng, kaba la pynwit pat ïa ka leit ka wan jong kiwei ki kali bad kumjuh ruh ïa ki nongïaid lynti. Ha kaba ïadei bad kane, ki pulit pynïaid kali jong ka nongbah Shillong (STP) ki dang pynlong ïa ka jingkhynra man ka por na ka bynta ban tehlakam ïa ki jingpynkheiñ aiñ ba la kdew haneng bad kiwei kiwei ki jingpynkheiñ aiñ MV Act.
Namar kata, ki pulit pynïaid kali jong ka nongbah Shillong ki la kyntu ïa iwei-pa-iwei nongñiah kali ban bud ryntih ïa ki kyndon ñiah kali haba don ha surok bad ban bat ïa ka akor ka burom haba ñiah kali bad ha kajuh ka por la maham ruh ïa kito kiba pynkheiñ ïa ki kyndon yn pynshitom katkum ka kyndon jong ka MV Act.
