Shillong, Nailur 11
Kawei ka samla ka la lait thaw na ka jingthmu shah batbor hadien ba ka la ïoh ban tied da u maw na ka bynta ka khlieh jong uwei u briew ba la kynnoh ba u la thmu ban leh ïa ka kam sniew pyrshah ïa ka. Kane ka jingjia ka la jia ha ka miet jong ka 9 tarik u Nailur 2024 ha Kenches Trace ha kaba la kynnoh ba u nongñiah taksi u la thmu ban thombor jubor ïa kane ka samla.
Haba ïakren bniah bad u kpa jong kane ka samla ïa uba la buhrieh kyrteng noh, u la ïathuh ïa ka jingjia kaba la jia ha ka 9 tarik ha ka por kumba 7 baje eiei ha kaba ka khun kynthei jong u kaba dang 21 snem ka rta katba ka dang wan phai na ka jaka bylla ka la shong da ka kali kamai ban leit sha ka shnong ba ka sah. Ynda la poi ha Kenches Trace, ka jaka kaba kham dum bad long khlaw la kynnoh ba une u nongñiah kali kamai u la pynsangeh ïa ka kali da kaba ong ba un ap sa ïa kiwei ki nongshong kali tang shiphang hynrei hadien katto katne, kane ka samla ka la sngewpher ïa kata ka rukom leh u nongñiah ka kali, kumta ka la pyrshang ban mih hynrei katba ka dang mut ban mih na kali u la bat nadien bad thmu ban tan ïa ka sha khlaw ban leh ki kam sniew. Shuh shuh u kpa jong katei ka samla u la ïathuh ba ka khun jong u, ha kane ka por ka la ïakhun tyngeh ban lait na u bad ha kum kane ka por, haba ka la tare ka kti sha madan, ka la ïoh tam ïa u maw bad ha kaba ka la tied na ka bynta ka khlieh jong une u briew, uba la kyllon ha madan bad mar kumta ka la ïoh ban phet.
U la pyntip ruh ba hadien katei ka jingjia, na ka liang ka ïing ka sem ha kajuh hi kane ka miet ki la leit ban buh da ka ejahar sha thanat Laban hynrei la kynnoh ba na ka liang u pulit ophisar ba don ha kane ka por u la kyntait ban pdiang bad ha kaba ka la mih ka thma ktien bad dei ha ka step kaba bud ba ki sa la leit ban buh da ka ejahar ha thanat Sadar.
Na ka liang u kpa katei ka khynnah, u la pynrem jur ïa kum kane ka jingjia bad dawa na ki bor ka aiñ ba kan shimkhia ban thwet ïa utei u ‘riew sniew.
