Shillong, Nailur 11
Ki runar ki bym lah ban ithuh ki dei kiei bad kiba kah durkhmat ki la ïoh ban lute ka pisa bad mobile phone na kawei ka dukan die sha kaba don ha ka shnong Diwah Ksehkohmoit ha Eastern West Khasi Hills.
Katkum ka khubor na ki pulit la ong ba kawei ka longkmie ryngkat bad u kurim jong ka, ki la ai ka jingujor ba ha ka 7 tarik mynta u bnai ha ka por kumba 11 baje mynmiet, ar ngut ki runar kiba la kah durkhmat bha ïalade ki la wan rung jubor ha ka dukan ka jong ki kaba don harud ka surokbah NH-106 bad ki la byrngem-byrsit ruh ïa ki bad hadien kata ki la lute ïa ka pisa kaba long haduh T.70,000 bad kawei ka mobile phone.
Ha kaba ïadei bad kane, na ka liang jong ki pulit mynta ki dang pynlong ka jingtohkit bad thwet ban kem ïa kitei ar ngut ki briew ban lap ïa ki daw tynrai bad ki jingshisha halor katei ka jingujor.
Ha kawei pat ka khubor, ka Purnima Paul ka la ujor sha ki pulit ba ha ka 4 tarik mynta u bnai ha ka por 11.35 mynmiet, ar ngut ki briew ba la tip kyrteng kum u Ranjit Kumar Shah (40 snem) bad u Ashok Shah (61 snem), ki la leit sha ka jaka sah jong ka bad pynbor ïa ka ban ai ha ki ïa u kynjri ksiar na ka bynta ban pynkhuid, ïa kaba ka la kohnguh. Hynrei hadien ba ki la ïoh ïa utei u kynjri ksiar, kitei ar ngut ki la phet krad noh.
