Khmih bniah ka Technical Committee ïa ki aiñ halor ka jingheh ka jaka tih dewïong

Shillong, Nailur 11

Ka Sorkar Jylla lyngba ka tnat mining and geology ka la bynshet ha ka Technical Committee ba kan khmih bniah ïa ki aiñ kiba ïadei bad ka jaka puta bad ki aiñ halor ka jingtih dewïong khnang ban pynkylla ïa ka Standard Operating Procedure (SOP) kaba la pynbeit da ka Sorkar Pdeng ha kaba la kdew ba ka jingtih dewïong katkum ka jingstad saïan ka dei ban long ha ka jaka kaba don ka jingheh ym duna ïa ka 100 hektar.

Ha ka jingshisha ka Sorkar Jylla ka la thaw ïa ka SOP hadien ba ka Sorkar Pdeng ka la pynmih kyndon ba ka jaka na ka bynta ban tih dewïong ka dei ban don ym duna ïa ka 100 hektar ha Meghalaya khamtam namarba ha kiwei ki Jylla ka jaka ban tih dewïong ka kham heh shuh shuh.

Ka Sorkar Jylla ka la thaw ïa ka Technical Committee ban pule bniah ïa ki aiñ bat khyndew bad ki aiñ ban tih ïa ki marpohkhyndew khnang ba lada don lad, hap ban pynbeit ïa ka SOP lyngba ka jingmynjur ki bor ba dei khmih ka Sorkar Pdeng.

La ong ba ka Technical Committee kan sa phah kaiphod sha ka tnat Mining and Geology halor kane bad lada donlad ban pynkylla, ka Sorkar kan pynhiar biang ïa ka jingheh jong ka par dewïong na ka 100 hektar sha kaba kham rit.

Ka kynhun ki trai par dewïong, kiba tih bad nongkhaïi dewïong ka la buh jingkylli ïa ka Sorkar halor ka jingwanrah ïa ka SOP kaba batai shaphang ka jingdonkam ban ïoh jingbit ban sdang ïa ka jingtih dewïong katkum ka juk stad mynta ha ka jaka ka bym duna ka ka 100 hektar.

Ki la ong ba ha ka SOP la batai ba yn ïoh jingbit ban tih dewïong lada don ka par dewïong ka heh 100 hektar katba ha ka MMDR Act pat ka kren ba ym dei ban duna ïa ka 4 hektar na ka bynta ban ïoh ïa ka lai sien.

La ong ruh ba katkum ka kyndon ban ïoh ïa ka Environmental Clearance, ka dei 5 hektar shaneng la lah ban ïoh jingbit na ka bynta ka jingtih dewïong.

Kumta ka la don ka jingdawa ba ka Sorkar ka dei ban pynbeit noh ïa kane, bad ban ïaid katkum ka aiñ kaba la don lypa.