Nongpoh, Nailur 11
Saw ngut ki snar nonglute kiba ju donkti ban lute ïa ki kali ha ka surokbah National Highway 6, ki la ngat noh sha ka shrip jong ki pulit ka Ri Bhoi District ha ka miet Sngi Ba-ar, kata tang hadien kumba katto-katne por ba ki la dep ban lute bad shoh ïa u nongñiah bad nongbud jong kawei ka kali kit dohkha ha Shangbangla.
U Additional Superintendent of Police ka Ri Bhoi District, u Bah B Jyrwa haba kren sha ki lad pathai khubor ha ka Sngi Balang, u la ïathuh ba ha kine ar ne lai bnai ba la dep, ki la don shibun ki jingujor na ki nongñiah kali halor ka jingdon jong ki runar kiba donkti ban lute bad shoh pynmynsaw ïa ki nongñiah.
U la ïathuh ruh ba ha ka miet shiteng synñia kata ha ka por kumba 1:16 baje eiei, kawei ka kali pickup kaba kit ïa ki dohkha kaba la thmu ban pynpoi sha Marngar, bad kaba la ñiah da u Abu Sadek na ka shnong Morigoan, Assam, ki la shah pynsangeh noh ha ki runar kiba wan lyngba ka kali Alto rong lieh kaba don ïa u nombor AS01-FN-4202. Kitei ki runar ki la shoh pynmynsaw ïa u nongñiah lem bad ïa u nongbud jong katei ka kali pickup bad lute ruh ïa ka pisa bad ki mobile phone.
Ki pulit ka thanat Nongpoh tang mar ïa ïoh jingtip halor kane ka bynta, ki la pynlong ka jingkhynra ha kylleng ki bynta ki sor Nongpoh tang hadien kumba katto-katne por ki la lap noh ïa katei kali Alto na Pahamsyiem bad ruh la ïoh kem shwa ïa u Ricky Tangsang (26 snem) na ka shnong Sajer, Nongpoh katba u Mustafa Lyngdoh (32 snem) na ka shnong Umlyngdkait u la lait phet na katei ka jaka.
Hadien ka jingthwet kaba jur da ka kynhun ba kyrpang jong ki pulit lem bad ki CrPF, la ïoh ban kem noh ïa u Mustafa Lyngdoh bad lyngba ka jingphla ka jong u, ki pulit ki la ïoh ban kem sa ïa ar ngut kiwei pat kiba donkti kiba kynthup ïa u Kyrshanbor Marweiñ (22 snem) na ka shnong Mawroh bad u Shem Warjri (27 snem) na ka shnong Umsning Proper ‘A’ kiba la pyndonkam lyngba kawei ka Baleno rong lieh ka bym pat don ïa u nombor.
Halor kane ka jingjia, ki la pulit ki la kurup noh ïa kitei ar tylli ki kali kiba la pyndonkam da kitei ki runar nalor 6 tylli ki mobile bad T.6750 ka pisa. La pynrung ruh ïa ka mukotduma ha thanat Nongpoh ha kaba la pynngat ïa kitei ki runar ha kiba bun tylli ki kyndon aiñ jong Bharatiya Nyaya Sanhita (BNS).
