Shillong, Nailur:
Ka Sorkar Jylla lyngba ki ophisar ka tnat Transport ka dang twad jingmut na kiba pynïaid bos kiba kamai na Meghalaya sha kiwei pat ki Jylla ba marjan bad lada lah ban phah ïa ki bos ban pyndonkam ïa ka jaka pynïeng bos lane Inter State Bus Terminus (ISBT) kaba don ha Mawlai khnang ba kan treikam kumba ju long.
Ka ISBT ha Mawlai Mawïong ka la kynjah bad kam shym la treikam bha naduh ba la khang ïa ki kali heh kiba kit jingkit khia palat 9 metric ton kynthup ïa ki bos ban ïaid lyngba ka jingkieng dam ha Umïam.
Ki bos kiba wan na Assam, Arunachal Pradesh, Nagaland bad Manipur ki la shu ïeng kat shaba ïoh jaka ïeng ha kaba ki don ruh ki bos kiba ïeng noh ha Lay-by kaba don harud ka pung Umïam namar kim lah shuh ban ïaid lyngba ka jingkieng dam ha Umïam ban wan sha Shillong ban leit ïeng ha ISBT. La ong ba kam long kaba suk ïa kine ki bos ban leit swait naduh na thaiñ Diengpasoh lane naduh Mawryngkneng ban wan shaduh sha ISBT ha Mawlai. Ka dang kham suk ïa ki bos bad ki paidbah ruh lada kine ki bos ki ïeng harud ka pung Umïam.
Wat ki bos kiba wan sha Shillong na thaiñ Silchar, Tripura bad Mizoram kim shym la wan shuh ban ïeng ha ISBT ha Mawlai wat lada ki ïoh ban wan sha Shillong.
U Symbud Myntri Rangbah uba peit ïa ka tnat Transport u Bah Sniawbhalang Dhar, u la ong ba u la dep bthah ïa ki ophisar ka tnat Transport ba kin ïakren bad kiba pynïaid bos bad yn sa shim ïa ki sienjam kiba ïahap lang.
U la ong ruh ba ka Sorkar ka don ka jingthmu ban shna ïa ka jingkieng kaba shipor kham sharum na ka dam Umïam khnang ba ki kali kit jingkit kin ïoh ban ïaid lyngba ban leit sha Shillong bad kumjuh ruh ki kali kiba kit jingkit kiba mih na Shillong.
Ha ka jingshisha, ka jingpyrkhing ka Sorkar Jylla ban ym shah ïaid katba mon ïa ki kali kiba kit jingkit kiba khia lyngba ka jingkieng ha dam Umïam ka la long ka sienjam kaba ki paidbah ki la ai jingïaroh khnang ba kane ka jingkieng kan long kaba shngaiñ.
Kum ban pynkynmaw, ha ka 30 tarik Naitung, 2024, la plie ïa ka jingkieng dam ha Umïam ban ïaid kali na baroh arliang, ha kaba la shah ban ïaid tang ki kali kiba kit jingkit khia tang hapoh 9 metric ton.
