Shillong, Nailur 12
Wat la ka jingpynlong ïa ka ilekshon MDC la sngewthuh ba kan dang shim por sa katto-katne bnai hadien ba ka Sorkar Jylla ka la pynjlan biang, hynrei ka jingpynkhreh jong ki seng saiñ pyrthei ka la ïaid shakhmat namar la sngewthuh ba kane ka ilekshon kan ym slem shuh.
Kumta ha kaba ïadei bad kane, ki la don haduh lai ngut ki rangbah kiba la mih shakhmat ban pan tiket na ka Voice of the Peoples Party (VPP) na ka bynta ban ïakhun ha ka ilekshon MDC napoh ka Mawthadraishan Konsti-twensi, kaba hap hapoh ka Eastern West Khasi Hills District.
Katkum ka khubor kaba la ïoh lum la ïathuh ba ki lai ngut ki rangbah kiba la mih shakhmat ban pan tiket na ka VPP ban ïakhun na Mawthadraishan ki long u Bah Powell Sohkhlet, Bah Rishan Nongrum bad Bah Tailin Lyngkhoi.
Ki khubor na ki nongïalam ka VPP, la ïathuh ba haduh mynta ki dang don tang lai ngut kiba pan tiket na Mawthadraishan hynrei ym lah ban tip la kin dang don ne em haduh ban da pynbna ïa ka ilekshon.
Kine ‘riew rangbah kiba pan tiket ki la poi ruh ha kti jingtip jong u President ka VPP Bah Ardent M Basaïawmoit hynrei ïa kane kin sa shim da ka rai ban jied tang uwei ynda ka sorkar jylla ka la pynbna ïa ka ilekshon MDC.
Kum ban shu pynkynmaw ba ka Mawthadraishan Konstitwensi ka dei ruh kawei na ki konstitwensi kaba ki paidbah ki la ai ka jingkyrshan bha ïa u Dr. Ricky A.J Syngkon ha kane ilekshon MP ba la dep.
Nalor ka VPP, ki seng saiñ pyrthei ki ban sa sei kyrtong ha ka ilekshon MDC na Mawthadraishan-Parïong ki dei na ka HSPDP, UDP, NPP, Congress bad kiwei kiwei.
Lah ban kdew ruh hangne, ba ïa ka shuki MLA ba mynta na Mawthadraishan Konstitwensi la mihkhmat da u Bah Shakliar Warjri jong ka HSPDP uba dei ruh u Myntri hapoh ka Sorkar bad ïa ka shuki MDC ba mynta dang bat da u Bah Jambor War jong ka UDP.
