Nongstoiñ, Nailur 12
Ka tnat Agriculture & Farmer’s Welfare jong ka sorkar Jylla ha ka Sngi Palei ka la ïoh ban aiti noh ïa ki ar tylli ki kali jong ka PRIME Agriculture Response Vehicle sha ki kynhun trei mon sngewbha bad shimet ba kynthup sha ka Nongriangka Weilong IVCS kaba hap hapoh ka Mawshynrut bad sha u Bah Johny Lyngkhoi ba na Rambrai Constituency.
Kitei ki artylli ki kali ki dei jong ka PRIME Agriculture Response Vehicle kiba dei hapoh ka CM Elevate Programme ïa kaba la pynlong da ka tnat District Agriculture Officer, West Khasi Hills District hapoh ka ophis Mawshynrut C&RD Block.
Ha kane ka sngi, kum ka dak jong ka jingpyllait paidbah ïa kitei ki ar tylli ki kali, u Bah Methodios Dkhar, MLA ka Mawshynrut konstitwensi u la ong kum u kongsan bad u RG Momin, MLA ka Rambrai Jyrngam konstitwensi kum u Symbud kongsan, kiba la kaweh ïa ka lama bad aiti ïa u shabi jong kitei ki kali sha ki arngut ki rangbah kiba dei ki nongtrei mon sngewbha na katei ka thaiñ.
Haba kren ha ka jingïalang aiti ïa kitei ki kali kit mar rep ïa ka Mawshynrut bad Rambrai-Jyrngam, u Bah Methodios Dkhar u la pynpaw ba bun ki skhim na ka sorkar kim poi sha ki briew ba dei hok ban ïoh namar ba duna ki lad ai jingtip.
“Ka jingpyllait paidbah ïa kine ki kali ka dei ruh shi bynta ban ai jingtip ïa ki paidbah halor ki skhim sorkar bapher bapher,” ong u Bah Methohdius.
U la kyntu ruh ïa ki ophisar ba kin long kiba kham jynsur mynsiem na ka bynta ki paidbah bad kumjuh u la kyrpad ruh ïa ki paidbah ban don ka jingïa burom ba markylliang ban pyntyllun ïa ki kam ha ki ophis bapher bapher.
Ha katei ka sngi la ïadonlang ki ophisar sorkar bapher bapher kynthup ïa ka Kong P Ïawim DAO, Nongstoiñ, u Bah WB Marbaniang, DHO Nongstoiñ, Bah Reginald Kharkongor BDO ka Mawshynrut C&RD Block bad kiwei kiwei na ka tnat Agriculture.
