Shillong, Nailur:
U MP ka Voice of the People Party (VPP) na Shillong Parliamentary konstitwensi, Dr. Ricky A.J. Syngkon ha ka Sngi Balang u la ai jingmut ban pynrung ïa ki ktien tnad bapher-bapher ha ka thoh ka tar khnang ban pynriewspah shuh-shuh ïa ka ktien Khasi bad ban lait ka ïashim na kiwei pat ki jait ktien.
“Ngi dei ban pynshlur ba ki ktien tnad kum ki ktien shnong na ki thaiñ War, Ri-Bhoi, Maram, Lyngngam bad kumta ter-ter, ba hapoh ka jingïalam ka KAS ba kin pynrung ha ka thoh ka tar khnang ban nang pynriewspah ïa ka ktien Khasi ha ka jaka ba ngin shim na kiwei,” ong u Dr. Syngkon haba ai jingkren kum u Kongsan ha ka jingrakhe ïa ka Sngi ka Thoh ka Pule ne ka ‘Literary Day’ ha ka lyngkhuh snem kaba 45 jong ka Khasi Authors’ Society (KAS) ha Sankardev College, Shillong.
Ha kane ka sngi la pynlong ruh ïa ka Lympung Ïamir Jingtip (Regional Seminar) halor ka phang – “Ka Shillong, ka Mynnor, ka Mynta bad ka Lashai”, ha ki ar tylli ki Sienshong.
Halor ka jingdap 45 snem ka jingïaid lynti ka seng, u MP u la ong, “Ai ba kane ka sngi kan pynkynmaw bad kyrsiew thiah ïa ngi ba dei ka ktien kaba long kawei na ki atiar kaba lah ïa ka ban tehsong bad ban tei ïa ngi kum ka jaidbynriew nalor ba ka ïarap ruh ban kyntiew ïa ka Lariti jong ngi.”
Ha kajuh ka por, u la ai jingïaroh ïa ka seng halor ka jingtrei shitom jong ka haba phai sha ka jingroi ka thoh ka tar, poitri, drama, khana mynbarim nalor kiwei-kiwei.
“Hynrei nga sngew ban ong ba dang don ruh pat shibun kiba dang sah shrah ba kum ka KAS bad baroh kiba don ka jingkitkhlieh ïa kaba dang hap pynmih ka syep ka syar ha ka ban nang kyntiew ïa kane ka ktien jong ngi kum ha ka liang ka saïan, koit ka khiah, dawai-dashin, ka ïoh ka kot bad kumta ter-ter,” u la ong.
Ha kren halor ka phang jong ka Lympung Ïamir Jingtip, u Dr. Syngkon u la pynsngew ba kaei kaba u ïohi haba peit ba khmih ïa ka jinglong-jingman ka Shillong ha ka mynnor, mynta (ngam tip ïa ka lashai), u la ong ba haba ym don ka jingïohi jngai, ka ri bad ka jaidbynriew kan sa shu jah rngai.
“Ngi kiba don hangne, kiba la ïohi ïa ka mynnor, kiba ïohi ïa ka mynta, ngi ïohi shisha, ki don kiei-kiei kiba ngi la duh bad don kiei-kiei i kumba ngin sa duh noh haba ngi phai kum sha ka mariang sawdong-sawkun jong ngi, kiei-kiei kiba u Blei u la buh la bsut ha ka mariang ha kane ka ri kaba ieid jong ngi. Nangta haba phai sha ka akor ka burom, imlang-sahlang bad kiwei-kiwei ki bynta, ngi ïohi shisha – ngi la duh ïa kiei-kiei kiba kordor,” ong u MP.
Ha kawei ka liang, u la ong, “Wat hapdeng kita kiei-kiei baroh, ngi don ha kane ka por, ha kane ka jaka kum kita kiba don ka jingkitkhlieh ba ngin leh eiei ïa ka lashai ka la shi sngi da kaba ngi ïa pyrkhat ïa puson lyngba ka jingprat lynti bad jingpashat jingmut jong kine ki ‘riewshemphang ha ryngkat ka jingphylliew jingmut lang jong kito baroh ki ban ïadon bynta. Ngam jingartatien ba nangne ngi lah ban don ka jingïohi jngai nangne shakhmat.”
Hashuwa, la ïoh ïa ka jingkren na u President ka KAS, Prof. D.R.L. Nonglait uba la batai bniah halor ka jingïaid lynti bad ki kam kiba ka seng ka la synñiang ha kine ki 45 snem ba la leit bad kiwei-kiwei.
Nalor kane, la ïoh ruh ïa ka jingsam khusnam sha ki samla pule ba ïoh heh duh ki ‘mark’ ha ka sobjek Khasi.
