Jowai, Nailur:
U State Education Commissioner (SEC) ka sorkar Meghalaya Prof. S.M Sungoh ryngkat u Prof. David Ried Syiemlieh, u Tony TC Marak Advisers bad Members State Education Commission ha ka 11 tarik Nailur ki la hiar sha Rilum Jaiñtia ban ïakynduh ïa ki nonghikai kolej kumjuh ki nonghikai skul ban ïakren halor ki jingeh bapher bapher kiba ki jaka pule ki ïakynduh ha baroh ar tylli ki District jong ka rilum Jaiñtia kata ka East Jaiñtia Hills District bad West Jaiñtia Hills District.
Ha ka jingïalang kaba la long ha Kiang Nangbah Government College Auditorium, Jowai u shongknor jong ka jingïalang u Prof. SM Sungoh u la pynpaw ba ka jingthmu jong kane ka jingwan ka jong ki, ka long ban bishar ïa ka jinglong jingman jong ka pule puthi hapoh ki District bad ban lum jingtip ki ban ïarap ïa ka Commission ban ai jingmut pat sha ka Sorkar.
Ka jingïakren ka long halor ki mat pyntreikam ïa ka prokram bathymmai kynthup kiba ïadei bad ka NEP 2020 bad ban jur ruh ïa ka jingdonkam ka jingïatreilang ban wad ïa ki lad ki lynti.
U Prof. SM Sungoh u la ban jur ruh ïa ka jingdonkam ka jingroi jong ki samla ha ka pule puthi, ka met bad ka jingmut jingpyrkhat bad u la ban jur ïa ka jingdonkam ka jingkitkhlieh lang jong ki nonghikai ha kaba pynwan dur ïa ki khynnah bad samla pule.
Ha kane ka jingïalang, ki nonghikai ki la pynpaw ïa ki jingeh kiba ki ïakynduh kynthup naduh ka jingbym biang ki jaka leit paiñkhana, ki jingtei, bad ki mat kiba ïadei bad ki nonghikai kiba la shah pyntbit (Trained) bad ki bym pat shah pyntbit (Un-Trained) kumjuh ka jingduna jong ki staff ne ki nongtrei.
Ki nonghikai ki la pynpaw ruh ïa ki jingeh halor ka jinghikai na ka bynta ka Common University Entrance Test (CUET), da kaba kyrpad ruh ban buh ïa ki Coaching Class khnang ban ïarap bad kyrshan ïa ki samla pule ha ka jingpynkhreh ka jong ki.
K ila pynpaw ruh ba bun ki samla pule, khamtam kito kiba na ki thaiñ nongkyndong ne kiba kham duna ka jingïohnong kim ïoh ïa ka jinghikai kaba bha bad bunsien kim tip ïa kum kine ki lad, kaba buh pat ïa ki ha ka jingeh.
U Adviser u Tony TC Marak u la pyntip ba ka State Education Commission kan sa lum lang ïa ki mat bad ki jingai jingmut kiba la wanrah ha kane ka jingïalang bad ban phah pat ïa ki sha ka sorkar na ka bynta ban leh ïa kaba donkam.
Ha kajuh ka por, u la kyntu ïa ki nonghikai ban pyrkhat ïa ka lawei jong ki skul bad ki kolej ha kine ki shi snem ban wan bad ban wad ïa ki lad ki lynti wat hapdeng ki jingeh kiba la don lypa.
Ka Kong B Blah, Additional Deputy Commissioner ka West Jaiñtia Hills District, ka Kong JU Kharpuri, Additional Deputy Commissioner, East Jaiñtia Hills District ruh ki la don lang ha kane ka jingïalang.
