Shillong, Nailur 12
Hadien ka jingsaphriang ka khubor halor ka jingshah thombor jong kawei ka khynnah samla kaba la jia ha ka miet jong ka 9 tarik Nailur 2024 ha ka por kumba 7 baje eiei, u President ka seng kiba ñiah taxi kiba ju ïeng kali ha ki thaiñ Rhino, u Paul Kharnadu ha ryngkat ka jingsynran lang jong ka Synjuk Ki Nongñiah Taksi Sor bad Khapsor, ki la ong ba kum ka seng kam don bynta eiei ha kaba ïadei bad ka jingjia kaba la jia ha ka miet 9 tarik ha kaba na ka liang ki bahïing bahasem jong kane ka khynnah samla ki la kynnoh ba la don uwei briew uba kamai na ki bynta jong ka thaiñ Rhino, u la rahbor bad thmu ban leh ïa ki kam bymman pyrshah ïa kane ka khynnah samla ha ka surok ha Kenches Trace.
Haba ïakren bad ki lad pathai khubor ha ka Sngi Palei u Bah Paul u la ong, kum ka seng ka la pynlong ïa ka jingtohkit bad ruh ka jingwad bniah halor ka jingdon jong uba kum uta u nongñiah kali kamai hynrei kam shym la lap ba yn don kaba kum kata kumba la kynnoh bad u la ong ba kane ka long tang kum ka jingpynthohbria ïa ki nongñiah taksi kiba ïeng ha Rhino.
“Ka long tang kum ka jingpynthohbria kaba pynduh jingshaniah na ki paidbah bad kumta kum ka kynhun ngi kyntu ïa ki nongshong kali ba kin long kiba adkar bad shemphang ha ka leit ka wan,” ong u Bah Paul.
U la ong ruh ba lyngba ka khubor kaba la mih ka la pynlong noh ïa ki kmie ki kpa jong ki khynnah bad ruh ki kynthei ba kin duh ka jingshaniah ha ka ban shong ïa ki kali kamai kiba don ha kane ka thaiñ.
Ha kajuh ka por, u Bah Paul u la kyntu ïa ki paidbah kiba ju shong kali kamai ba kin shong beit na ka jaka ïeng kali kaba don ha Rhino bad ban ym long kiba kyrkieh khnang ba kin ym mih kino-kino ki jingjia kiba sngewsih ne bym sngewtynnad bad ruh ba kan don ka jingshngaiñ.
“Lada jah tang ka mobile phone ne ka pisa ne ka tiar jong phi ha ka kali kaba phi shong na ‘stand’, phin ïoh biang namar ngi la hikai ïa uwei-pa-uwei u nongñiah kali ban pynphai biang ïa ka tiar ka bym shonghok bad ka bym dei ka jong lajong”, bynrap u Bah Paul.
U la pynrem jur ïa utei u briew uba la shah kynnoh thmu batbor ïa katei ka samla namar kane ka la pynjah burom ïa ki nongñiah kali kamai kiba ju ïeng ha Rhino.
