Shillong, Nailur 12
Ka kynhun ki nongñiah kali kamai kiba don hapoh ka lama jong ka Synjuk Ki Nongñiah Taksi Sor bad Khapsor, ha ka 12 tarik u Nailur 2024 ki la leit ban ïakynduh ïa u Superitendant of Police (SP) ka East Khasi Hills, u Bah Sylvester Nongtnger ban leit ïakren ha kaba ïadei bad ka jingjia shah kynnoh thombor jong kawei ka khynnah samla ha uwei u nongñiah taksi kaba la jia ha ka 7 baje janmiet jong ka 9 tarik u Nailur 2024 ha Kenches Trace katba ka dang wan bylla bad thmu ban leit sha la ïing ha kaba ka la shong da ka kali kamai najan Rhino.
Haba ïoh ban ïakren bad ki la pathai khubor hadien ka jingwan ïakynduh ïa u SP ka EKH, u Bah Kyrmenlang Khonglah uba dei u President ka Synjuk, u la ong ba katei ka samla kaba la shah kynnoh thombor ha katei ka miet, ka khlem shong da ki kali ba la ïeng ha ki jaka kali kamai ha Rhino ban leit sha la ïing hynrei ka la kiew da ka kali kamai kaba la shu ïaid lyngba katei ka jaka. Wat la katta ruh na ka liang u SP u la ong ba kumba 99% lah ban kem ïa utei u briew uba donkti ha katei ka kam runar.
Na ka liang ka Synjuk hadien ka jingïohi ha ki lad pathai khubor ïa ka jingai jingkren jong u kpa katei ka khynnah samla kaba la kynnoh shah thombor ha katei ka miet, na ka liang ka Synjuk ka la pynrem jur ïa kum kitei ki kam bymman bad ïa u briew uba thmu ban batbor ïa katei ka samla bad ong ba lada ka Synjuk ka lap ïa utei u briew, kan sa ai da ka jingsneng kaba tyngeh bha.
“Tang ka jingleh jong uwei u nongñiah kali, ngi shah kynthoh lang ma ngi baroh ki nongñiah taksi. Ngim sngewtynnad ïa kane bad ngi pynrem jur ruh ïa kane ka jingthmu batbor jong une u briew bad lada ngi lap ruh ïa u, ngin sa ai da ka jingsneng na ka liang ka Synjuk ki nongñiah taksi”, ong u President.
Ka Synjuk ka la kyntu ruh ïa ki paidbah nongleit-nongwan ba ki dei ban shong da ka kali kaba ïeng ha ki jaka pynïeng kali khnang ba kan wanrah ïa ka jingshngaiñ ha ka leit ka wan jong ki.
Shuh shuh na ka liang ka Synjuk ruh ka la wad jingtip ruh ïa utei u briew u ba la shah kynnoh donkti ha ka jingthmu thombor ïa katei ka samla hynrei ka Synjuk ka khlem lap satia ïa utei u briew hapoh ka kynhun jong ka.
“Kum ki paidbah ki dei ban long kiba adkar bad ban peit bha ïa ki nongñiah kali kamai ba lada ki lap ba u nongñiah u dei ba la buaid drok ne buaid kyaid ruh, kim dei shuh ban shong kali”, bynrap u Bah Khonglah.
