Shillong, Nailur 12
U Bah Latiplang Kharkongor uba dei u MDC ka Nongthymmai Konstitwensi bad ruh u Chief Executive Member (CEM) barim ka Khasi Hills Autonomous District Council (KHADC) u la khlad noh na kane ka sla pyrthei ha ka janmiet jong ka 12 tarik u Nailur 2024 hadien ka jingban ka jingshitom kaba la neh la kumba katto-katne bnai eiei.
Hadien ka jingban jong ka jingpang kaba la neh katto -katne bnai, u Bah Latiplang u la dep ban leit shah sumar kylleng bad ruh sha nongbah Delhi bad ïa ka sngi kaba khatduh u la pynkut hapdeng ka jingshah sumar ha Civil Hospital Shillong.
Kum ban shu kdew hangne, u Bah Latiplang u la shah jied kum u MDC haduh saw sien kynthih, kata naduh ba u la jop nyngkong ha u snem 2004, nangta ha u 2009, 2014 bad 2019. Lah ban pynkynmaw ba ha u bnai Naiwieng jong u snem 2019, u Bah Latiplang Kharkongor kum u MDC shimet u la shah jied ruh ban shimti syndon ïa ka shuki CEM jong ka KHADC hynrei khlem ïoh thaw pat ïa ka Executive Committee namar ka jingbun ka drama saiñ pyrthei hapoh ka Council. U Bah Latiplang u la bat ruh ïa ka shuki Executive Member bad peit ïa ka tnat Trade nalor kiwei pat ki tnat bapher bapher.
Ha shwa ban ïakhun ïa ka ilekshon MDC ha u snem 2004, u Bah Latiplang Kharkongor u dei ruh uba la bat ïa ka kam President jong ka Hynñiewtrep National Youth Front.
Ka jingduh kynsan ïa u Bah Latiplang Kharkongor uba dei u MDC ba la rim bha, ka long kaei-kaei ka jingduh kaba khraw ïa ki paidbah ka Bri u Hynñiewtrep khamtam ïa ki paidbah ka Nongthymmai Konstitwensi baroh kawei namar ba u long u briew uba sngewrit bad u nongmihkhmat uba la trei bha ha kaba u la ïoh ïa ka jingieid na kiba bun.
Mar ïa ïoh jingtip halor kane ka khubor kaba sngewsih, u Bah Pynïaid Sing Syiem, CEM ka KHADC u la leit mar-mar sha Civil Hospital ban sngewlem bad pynpaw ruh ïa ka jingsngewsih halor ka jingkhlad noh jong une u MDC.
U CEM u la pynbna ruh ba ka KHADC kan ai shuti shiteng sngi ha ka 13 tarik Nailur kum ka dak ka jingsngewlem halor ka jingkhlad noh jong u Bah Latiplang.
