Shillong, Nailur 12
Ha ka step jong ka Sngi Palei la kynnoh ba ki shipai Border Security Force (BSF) ki la beh noh ïa ki Khasi kiba dei ki trai ri trai muluk kiba ju shong die jingdie hajan ka kad khaïi ha Dawki.
Kane ka jingjia ka dei kaba la jia ha ka step jong ka 12 tarik Nailur ha Dawki Dryport Tamabil ha ka por kumba 8 ne 9 baje ha kaba ki briew kiba shong die waidong hajan kane ka kad khaïi kaba pynïaid ïa ki mar sha Bangladesh, la kynnoh ba ki la shah beh ha ki shipai BSF.
Katkum ki khubor ba la ïohlum la ong bad kynnoh ruh ba ki shipai BSF ki la beh bad phah lum noh ïa ki mar ki mata jong ki briew kiba dei ki nongshong shnong jong ka thaiñ Dawki bad ban ailad pat ïa ki briew na ka Ri Bangladesh ban wan rung khlem da tohkit bad peit bniah ïa ki kot ki sla jong ki bad ailad ruh wat ba kin buh dukan ha ki Canteen jong kane ka kad khaïi.
Katkum ki video (durkhih) kiba la saphriang, la ïohi ba ha kane ka por ka la don ruh ka jingïapyni nia kaba mar kylliang bad khluit hapdeng ki nongdie jingdie bad ki shipai BSF hadien ba la kynnoh ba ki la beh bad phah kynriah ïa ki kali jong kine ki briew kiba wan shong die jingdie ha kane ka kad khaïi kaba don ha Dawki.
Ha kane ka durkhih la ïohsngew ruh ba kawei na ki longkmie haba ïakren bad uwei u heh shipai jong ki BSF, ka la ong ba ki shong harud surok bad ruh sha ki bynta ba long kyndong bad ki khlem pynwit ïa ka surok. Shuh shuh kane ka longkmie ka la jubab ruh ïa une u shipai BSF da kaba ong ba ka surok Dawki-Muktapur ka dei ka surok jong ka PWD bad ka jaka kaba ki shong ka dei kaba jngai bha na ka khyrdop jong ka Dry-port kaba don kumba 70 haduh 90 phut.
Shuh shuh la ïohsngew ruh ba kine kiba shong die jingdie ha kane ka jaka, ki la ong sha ki BSF “Hato ngi die kyiad hangne, ba phi wan kynjat ïa ka kamai jakpoh jong ngi. Ngi khlem die kyiad, ngi die tang ka ja bad ka sha. Lada ha shnong lajong ngim ïoh ban kamai, te shaei ngin leit bylla, sha shong ki briew, ka ïing jong ngi ka don hangne.”
Ki la ong, “Kylleng ki jaka la ju lap ba ki don beit kiba shong die madan ha ki rud surok, ngi ruh hangne ngi shong die jingbam ngi khlem die ki jingdie ba sniew te lada beh noh ïa ngi, shaei ngin leit, ngim don jaka shuh, ngim don lad shuh, da kaei ngin bsa bad phah skul ïa ki khun.”
