Nongstoiñ, Nailur:
U Prof David R Syiemlieh, nongaibuit jong ka State Education Commission ka Sorkar Meghalaya u la pynpaw ba “Ngi wan hangne ym ban ai jingkular hynrei ban ïoh sngew ïa ki jingeh, ki jingduna bad ki jingdkoh jong ka pule puthi ha kine ki thaiñ bad ruh ban pynsngew sha ka Sorkar ïa kine baroh khnang ba ka Sorkar kan leh eiei.”
Ïa kane, na ka liang jong u Prof David R Syiemlieh u la kren bad pynpaw ha ka jingïalang ba la pynlong ha ka 10 tarik u Nailur, 2024 ha Vanni’s Hall St. Peter Higher Secondary School, Pyndengrei, Nongstoiñ.
Ha kane ka jingïalang la ïadon lang da ki Deputy Commissioner ka West Khasi Hills, South West Khasi Hills bad Eastern West Khasi Hills District, ki Principal, Headmaster, ki Nonghikai nalor kiwei. Ki nongïashim bynta ha kane ka jingïalang phylliew jingmut ki kynthup ïa ka jingkren bad jingai jingmut jong ki Deputy Commissioner, Principal, Headmaster, ki Nonghikai bad kiwei kiwei kiba don bynta ha ka pule puthi.
Shuh shuh ki nongïashim bynta ki la pashat ïa ki jingai jingmut, ki jingeh kiba kynthup ïa ka umbam umdih sha ki jaka pule, ka bording, ki paiñkhana bad kiwei kiwei ki jingdonkam, ki nonghikai kiba la pyntbit bad bym pat pyntbit, ka jaka sngi (midday meal), ka jingpep skul, ka jingwan pynrung skul, kajuh ka shuti ïa baroh ki skul Sorkar bad bym dei skul Sorkar, ka jingduna jong ki nonghikai bad ki office staff, skul building, ki madan ïalehkai, ka jingker kynroh, ka jingdon tang kawei ka DIET ne jaka ai jingpyntbit ia ki nonghikai na ka bynta ki lai District ban pynheh pynbha ia ka, nalor kiwei kiwei pat.
Katei ka jingïalang ka long kum ka rynsan ban ïa phylliew jingmut bad ki dkhot jong ka Commission ïa ki jingeh bad jingai jingmut halor ka pule puthi ha kine ki thaiñ bad ba ka Commission kan sa phah ïa kine ki jingeh bad jingphylliew jingmut sha ka Sorkar ban leh ïa kaba donkam.
