Nongstoiñ, Nailur 12
Lai ngut ki briew ki la shah kem noh ha ki pulit ka Nongstoiñ halor ka jingsuba donkti ban leit prong jubor shapoh ka ophis ka Khasi Students’ Union (KSU) West Khasi Hills kaba don hapoh ka shnong New Nongstoiñ bad ban rong tuh ïa ki tiar ki tar.
Katkum ka tyllong khubor na ki heh pulit ka District la ïathuh ba ki la ïoh pdiang ïa ka jingujor na u samla Wanbhakupar L Nonglait na Tiehsaw, Nongstoiñ, kata hadien ba u la leit sha ophis ha ka 11/09/2024 ha ka por kumba 6 baje janmiet u la lap ba la plie jubor ïa ka jingkhang jong ka ophis, bad mar ïa rung u la lap ba ka la don ka jingshah tuh ïa ka Sony TV, ka Inverter Battery, ka Mobile Phone bad ka Set top box ryngkat bad ka receipt bad ka warranty card jong ka TV.
Shuh shuh ka khubor na ki heh pulit ka District ka la ïathuh ruh ba ki pulit mar ïa ïoh ïa ka jingtip ki la pynlong ïa ka jingtohkit bad hadien da ka jingïarap jong u nongujor bad ki dkhot la suba ba u Lamboklang Puweiñ, Khrawkupar Nongsiej bad u Stonedingwell Marngar ki la donkti ha katei ka kam.
Hadien kane, na ka liang ki pulit ki la kem noh ïa kitei lai ngut halor ka jingsuba donkti ha katei ka kam. Ka khubor na ki heh pulit ka la ïathuh ruh ba ki la ïoh ban kurup noh ïa kitei ki tiar ba la shah tuh na Siejlieh na ka kamra kaba kitei ki briew kiba la shah kem ki sah.
