Nongpoh, Nailur 12
Tang shi sngi hadien ka jingshah kem jong saw ngut ki runar kiba donkti ban lute ha ka surokbah National Highway 6, ha ka miet kaba bud jong ka Sngi Balang, sa san ngut kiwei pat ki nonglute ki la ngat biang ha ka kti jong ki paidbah ha ka shnong Quinine.
Kitei san ngut ki runar ki dei kiba la pyndonkam lyngba kawei ka kali Autorickshaw ban lute ïa kawei ka trok kaba don ïa u nombor AS01-0C-3086 kaba sangeh marjan bad ka jaka die kyiad ha Umnget ban shet bam shet dih.
La ïathuh hadien katei ka jingjia, u nongñiah jong katei ka trok uba la shah lute pisa u la leit ban pan jingïarap na ki nongshong dukan marjan ha Umnget. Hadien ba la beh kthong la ïoh ban bat noh ïa kitei ki runar ha ka shnong Quinine ha kaba la shoh la bom ïa ki da ki paidbah kat haduh ba uwei na kitei ki runar u la mynsaw jur.
Halor katei ka jingjia, na ka liang ki pulit ki la shimti noh ïa kitei ki runar ban pynlong ïa ka jingtohkit bad ruh ban lap ïa ki jingshisha baroh ban ïaid katkum ki kyndon jong ka aiñ.
