Shillong, Nailur 12
Uwei u nongñiah Rapido u la shah shoh bad shah lute ka pisa bad shah knieh ruh ka mobile phone ha ka kynhun jong ki briew kaba la jia ha madan ïalehkai phutbol kaba don ha Motinagar, Shillong.
Katkum ka khubor na ki pulit la ong ba une u nongñiah Rapido ïa uba la tip kyrteng kum u Dadius Warjri u la ujor sha ki pulit ba ha ka 7 tarik mynta u bnai ha ka por kumba 6.30 janmiet, u la kyntiew ïa uwei briew ba la ‘book’ ka Rapido na ka thaiñ Anjalee, Shillong. Ynda la poi ha madan ïalehkai phutbol kaba don ha Motinagar, Shillong, la mih hynriew ngut ki paralok jong une u briew ba la ‘book’ ïa ka Rapido bad sdang ruh ban shoh ban tied bad ruh ban lute ïa ka pisa kaba long T.5,700 ryngkat ban knieh ïa ka mobile phone.
Ha kaba ïadei bad kane, na ka liang jong ki pulit ki la pynlong ka jingtohkit na ka bynta ban lap ïa ki jingshisha baroh halor kane.
