Shillong, Nailur 13
Ka Khasi Hills Auto-nomous District Council (KHADC) ha ka Sngi Thohdieng ka la kren shai ba ka khang pyrshah ïa ki kynhun lane ki briew kiba thmu wan ïalap khang bam dohmasi hapoh ka Jylla.
“Ka EC ka la ïoh ban ïakynduh hynne ka sngi bad ka la ïakren ruh halor kawei ka mat ba kongsan kaba ïadei bad ka Jylla bad ka jaidbynriew jong ngi – kata ka long ba ngi kwah ban pynpaw sha ki nongshong shnong ka Jylla bad shabar kumjuh ba ka KHADC nangne shakhmat ka khang pyrshah ïa kino-kino ki kynhun lane ki briew kiba wan ban ïalap khang bam dohmasi hangne ha ri jong ngi,” la ong u Chief Executive Member (CEM) ka KHADC, Bah Pynïaid Sing Syiem haba kren sha ki lad pathai khubor.
Haba kdew ba dang shen la sakhi ïa kawei ka kynhun kaba la wan rung sha ka Jylla ban sdang ïalap halor kane ka bynta, u Bah Syiem u la ong ba ka KHADC ka la pynkhreh ïa ka jingthoh ban phah sha ka Sorkar Jylla ba baroh ki bor pynïaid distrik kin tehlakam ïa kum kine ki kynhun ne ki briew kiba wan ïalap halor kane ka liang.
“Phi ïohi ka nongrim jong ka KHADC naduh ba ka Sorkar India ka don jingthmu ban pyntreikam ïa ka Uniform Civil Code (UCC) ruh, da kawei ka jingmut, ngi ong ba kam long ban pyntreikam ha ka Jylla namar ba ngi don shibun ki riti-dustur kiba u longshuwa-manshuwa u la hikai ïa ngi bad haduh kine ki sngi, ngi dang bud ïa kita,” u la ong.
Kumjuh u la pynsngew ba haba phai sha ka bynta ba ïadei bad ka jingkhang bam dohmasi, u la ong ba ïa kane ym lah ban pdiang satia naba ha ka jaidbynriew khamtam ïa ka bam tynrai kaba la ju pyndonkam, la ka long ka doh ne kiwei-kiwei khamtam ka dohmasi, ka dei kaba naduh hyndai-hynthai.
“Lada ki kynhun bapher-bapher ki pyrshang ban wan bad batai noh ïa ka rukom bam jong ngi, lehse kane kan ktah bad namarkata ka daw, na ka liang ka KHADC ka pyrshah jur ïa kino-kino ki kynhun kiba thmu hadien-habud ban wan shim kabu ïa ka jinglong kyrpang jong ka jaidbynriew la ka long ha ka bam ka dih, ka kup ka sem, ka khyndew ka shyiap nalor kiwei-kiwei haba ïadei bad ka jingriewspah ka jaidbynriew khamtam ha ki riti-dustur,” u la ong.
U CEM u la pynshai ruh ba hapoh ka Article 244 (2), 265 (1), la pynkup bor da ka Riti Synshar ka Ri ban long kyrpang kum ka jaidbynriew bad kumta ka KHADC ka kwah ba kane ka jinglong kyrpang kan ïaineh bad sah ha ki sngi ki por ban wan.
“Ka jingdon jong ka Khyrnit ba 6 ka thmu naduh u snem 1952 ban ïada ïa ka jinglong kyrpang jong ki Khasi bad kiwei-kiwei ki jaidbynriew ‘riewlum, ha Ri-lum Jaiñtia bad Garo kumjuh. Kumta lada wan noh kum kine ki kynhun ki ban batai ïa ka rukom bam jong ngi, lehse ka long kaei-kaei ka bym sngewtynnad,” u la ong.
Shuh shuh haba ban biang ba ka KHADC kan sa pynkynmaw sha ka Sorkar lyngba ka jingthoh halor ka Khyrnit ba 6 kaba la pynkup bor ïa ka jaidbynriew – ka jinglong kyrpang kum ka jaidbynriew, u la ong ba kum kine ki kynhun kim dei ban wan ban tuklar khamtam haba ïadei bad ka jinglong kyrpang, ka riti-dustur jong ka jaidbyriew.
“Ïa ki bym kwah, kata ka shong ha ka rai shimet jong ki, hynrei kiba kwah ban bam ruh, kata ruh ka shong ha ka rai jong ki hynrei ym dei ban don ka jingkhang pyrshah,” la ong u Bah Syiem.
