Ki kyntien – Ka jingpeitngor ka dei ka dor jong ka jinglaitluid – ki dei kiba ngi hap ban ïa puson bha ha kum kine ki por ba ngi la ïohi ïa ka jingshah ktah jong ka hok longbriew manbriew, ka jinglong laitluid, bad ka jingshah knieh jyndet jong ka hok ban im. Ka jinglong laitluid, ym laitlan, ka dei kawei na ki nongrim jong ka longbriew ka manbriew. Haba ngi la ïoh ïa ka jinglaitluid, bunsien ngi klet pat ban long kiba peitngor. Ngi pyrkhat ba yn ym don kiba lah ban knieh shuh ïa kata ka jinglaitluid na ngi. Kam long kumta. Kano-kano ka sorkar ka pyndonkam ïa ki buit bad ki aiñ kiba laiphew jait laiphew skit ban pyrshang ban teh kynjri ïa ka jinglong laitluid jong ki nongshong shnong. Lada ym dei ka sorkar, da kiwei pat ki bor ki pyrshang ban knieh ïa u lakam jong ka jingsynshar khnang ban ïoh ïuhroit ïa ka jinglong laitluid.
Kito kiba bat ïa u lakam jong ka jingsynshar – la ki dei kiba la shah jied hi ha ki paidbah lane kiba shu wan knieh jubor – kim ju kwah ba ki nongshong shnong kin kylli jingkylli ïa ki lane ba kin ïatynjuh bad ki lane ban ïapyni nia. Hynrei, lada ki nongshong shnong kim pyndonkam ïa ka sur ban kylli jingkylli lane ban ïapyni nia, ka long thik kumba ong: Ka Ri jong ki langbrot kan shah synshar ha ki suri. Ki lynnong na ka histori ki pyni ïa kine kiei-kiei. Ki don bun bah ki Ri kiba la don da ki nongsynshar donbor kiba kheiñ ïa ki nongshong shnong ba ki dei tang kum ki mraw bad ym ki briew. Ïa kiba pynmih sur, la set byndi ïa ki lane la shu pynjah klep shano-shano. Ïa kiba dawa laitluid, la pynkhrew ïa ki da kiba bun rukom. Ïa kiba kylli jingkylli, la set sbak ïa ka shyntur jong ki. Kumba la ju kdew na ka por sha ka por, ka histori ka dei ka skulbah kaba ai jinghikai, jingsngewthuh, kaba sneng ba kraw, bad kaba bsut ha ki jingmut jingpyrkhat ba ngim dei ban shim sting ïa ka jinglong laitluid.
Hooid, ka dei ka kamram jong ka sorkar ban pynthikna ba ki nongshong shnong kin im hapdeng ka suk ka saiñ, ka bha ka miat bad ban khanglad ïa ki kam ïakynad, ïaumsnam bad kumta ter-ter. Namarkata, ki sa mih bun phew jait bun phew skit ki aiñ ki kanun. Ka Ri kaba khlem aiñ, ka dei kaba laitlan, ym kaba laitluid, bad ka long ka jingma kaba khraw. Ha ka jingsynshar paidbah, dei ki paidbah kiba pynkup bor ïa ki nongïalam ba kin thaw ïa ki aiñ da ka jingkhmih lynti ba ka synshar ka khadar kan long kaba hok, kaba khuid, kaba lait na kino-kino ki jingbit tngit kum ka jingbamsap ka jingbam-ngem, kaba burom ïa ka jinglong laitluid, bad ka bym shah liang.
Phewse, bunsien kam ju long kumta. Ka long beit da khongpong. Mar ïa kiew ha ka khet jong ka jingsynshar, hangta la klet ïa kita kiba pynkup bor. Nangta ki sa mih sa ki jingkhñium sharum shaneng ba ki nongsynshar ki long kiba kumne bad kumtai. La hap ban shu ïa ap dohim-dohïap lano ba kan kut noh ka samoi jong ka jingsynshar jong kita ki nongsynshar khnang ban wanrah ïa ka jingkylla. Tangba ynda la dep pynkylla ruh, ka jinglong jong kita ki nongsynshar bunsien ka neh kumjuh lane kan nang kham sniew pynban.
Watla katta, kum ki nongshong shnong ngim dei ban duh jingkyrmen. Ngi dei ban bteng ban long kiba im suk im saiñ, kiba burom iwei-ïa-iwei pat, kiba ieid ïa la ka jong bad burom ïa ka jong kiwei, kiba buh jingkylli ïa ki nongsynshar, kiba durïap ban wad ïa ki jingshisha, kiba trei minot ha ki kam ki jam, bad kiba peitngor khnang ba ka jinglong laitluid kan neh. Ngi don la ka jong ka jong ka bor ban wanrah ïa ki jingkylla bad ka shong ha ngi kumno ngi pyndonkam ïa kata ka bor – la ka dei na ka bynta ka jingbha lane na ka bynta ka jingsniew.
