Shillong, Nailar 16
U Myntri Rangbah ka Jylla, Conrad K. Sangma u la pyntikna ba ka Sorkar kan ïai bteng ban buddien na ka Sorkar Pdeng ban pynrung ïa ki ktien Khasi bad Garo ha ka Khyrnit ba 8 jong ka Riti Synshar ka ri, da kaba ñiew ïa ka ktien kum ka bynta kaba kongsan jong ka jinglong kyrpang ka Meghalaya.
Haba ai jingkren ha ka jingrakhe sngi laitluid kaba 80 snem ha Madan Polo, u la ong, “Ka mynsiem jong ka kolshor ka im ha ka ktien jong ka. Ngi la shim ïa ka sienjam ka ban sah kynmaw ban ai ïa ka Khasi bad Garo, ïa ka kyrdan kum ki ktien Sorkar, ryngkat bad ka ktien Phareng. Ngin dang ïai bteng ruh ban buddien ha ka ban pynrung ïa ki ha ka Khyrnit ba 8 jong ka Riti Synshar ka ri India.”
Ha kajuh ka por, u Myntri Rangbah u la kren haba ïadei bad ka mat halor u pud u sam kaba la sahteng la slem hapdeng ka Meghalaya bad Assam.
U la ong ba ka Sorkar jong u ka la ïaid kham shakhmat ha ka sienjam treikam jong ka “Status Quo” kaba hashuwa, bad ki kam ruh ki la ïaid beit ha ka lynti kaba dei.
“La sakhi ïa kajuh ka jinglong ba ïaishah haba khmih ïa ka jingeh jong u pud u sam hapdeng ki ar Jylla. Ha kaba ki Sorkar kiba hashuwa, ki kren tang ban pynneh ïa ka ‘Status Quo’, kane ka Sorkar ka la ïasoi ïa ka MoU bad ka Assam ha u bnai Lber, 2022, da kaba pynbeit ïa 6 na ki 12 tylli ki jaka kiba don hapdeng ka jing-ïa-ka-jia, bad ban wanrah biang ïa ka suk ka saiñ sha ki jaidbynriew kiba don ha khappud, kiba mynta ki lah ban im khlem jingtieng. Ngin nang ïai bteng ban ïaid shakhmat ha ka ban wad ïa ka lad jingpynbeit haba ïadei bad ki 6 tylli ki jaka kiba dang sah,” la ong u Conrad.
Haba pynpaw ïa ki sienjam ha ka liang ka kolshor, u la kdew ba ka rynsan ‘OTT’ jong ka Sorkar, ka ‘Hello Meghalaya’ mynta ka don haduh 450 tylli ki nongrwai Khasi, Garo bad Pnar.
Haba buh ïa ka saiñdur treikam jong ka Sorkar hapoh ka “jingïaishah, ka jingïashim bynta bad ka jinglah ban pynurlong,” u Myntri Rangbah u la kdew ïa kiwei pat ki jingïoh myntoi kynthup ïa ki lai snem khlem ka jingpynlip bording katkum ka por ba la buh, ka rukom siew tulop kaba thymmai na ka bynta ki 23,000 ngut ki nonghikai naduh u bnai Ïaïong 2026, bad ka New Shillong Township ka ban sa wan.
U la ong ba ka ïoh ka kot jong ka Meghalaya ka la kiew palat ar shah naduh u snem 2018, kaba pynlong ïa ka kum ka Jylla kaba lai, kaba kiew sted tam ha kine ki san snem ba la dep.
Katba ka Jylla ka la jan dap 55 snem bad ban pynlong ïa ka jingïalehkai ‘National Games’ kaba 39 ha u snem ban wan, u Sangma u la kyntu ïa ki nongshong shnong ban don ïa ka jingkyrmen skhem.
“Kiei-kiei kiba khraw ki shim por. Ki donkam ïa ka jingminot, ki donkam ïa ka jingïashim bynta bad khamtam, ki donkam ïa ka jingthmu. Lada don kawei ka khubor kaba nga kwah ba phin rah sha ïing mynta ka sngi, to ai ba kan long kane: to long kiba kyrmen skhem, to long kiba ïaishah bad to angnud ban kynjoh ïa ka thong jong ka jingjop,” u la ong.
