Jowai, Nailar 16
Ka West Jaiñtia Hills District kala rakhe ïa ka sngi laitluid jong ka ri ne ka Independence Day ha ka rukom kaba iphuh iphieng da ka jingwan sakhi lang ki paidbah nongshong shnong na kylleng ki shnong ha madan Jrisaleiñ Chutwa-khu, Jowai ha ka 15 tarik Nailar.
U Lamphang ka ïingdorbar thawaiñ ka Meghalaya u Thomas A Sangma u la shim ïa ka bynta ban pynher ïa ka lama lai rong ka Ri bad shim ruh ïa ka Rashtriya Salute ïa 35 tylli ki kynhun kiba kynthup ka District Police Jowai, 42 Meghalaya BN NCC Jowai, bad 33 tylli ki skul.
U Lamphang u la sam khusnam ruh sha ki nongjop ha ka March Past ha kaba ka PM Shri School JNV Mukhla kala wan ha ka kyrdan ba nyngkong, ka Jaiñtia Higher Secondary School Jowai kala wan ha ka kyrdan kaba ar bad ka Thadlaboh Presbyterian Higher Secondary School, Jowai kala wan ha ka kyrdan kaba lai.
La pynphuh pynphieng ïa kane ka jinglehkmen da ka jingïashim bynta ki khynnah skul ha ki jingshad bad ïalehkai drama.
Ha Amlarem u MLA ka Mowkaiaw Ma Nujorki Sungoh u la long kum u kongsan ban pynher ïa ka lama lai rong jong ka ri bad shim ruh ïa ka Rashtriya Salute ha madan ka Amlarem Secondary School.
La rwai ruh ïa ka jingrwai National Song ‘Vande Mataram’ kaba pyni ïa ka jinglong kongsan jong ka jingrwai ha ki 150 snem, bud sa ka jingpynher ïa ka lama ka Ri da u kongsan bad ka jingrwai ïa ka National Anthem.
Ïa ka jingïaid parade la lamkhmat da u Sub-Inspector R. Surong napoh ka Meghalaya Police, ABSI, West Khasi Hills District, ryngkat ki kynhun pulit bad ka jingïashim bynta ruh da ki skul bapher bapher.
Ka Syiem Jingsuk Band ruh ka la ïashim bynta ha ka jingïaid parade, kaba la kham pynkyrpang shuh shuh ïa kane ka jingrakhe mynta u snem.
Ha kane ka sngi la sam khusnam ruh sha ki nongjop March Past, ha kaba ka Syiem Jingsuk Higher Secondary School, Amlarem kala wan ba nyngkong, ka Nongtalang Government Higher Secondary School kala wan ba ar, katba ka Amwi Jarain Secondary School, Jarain kala wan ha ka kyrdan kaba lai.
La ïoh ka jingrwai bad jingshad na ka Nongtalang Government Higher Secondary School, ka Di Iah Synroplang VO, Amlarem bad ka Amlarem Secondary School.
La sam khusnam Best Performing Anganwadi sha ka Sacrify Gassah, nongtrei Anganwadi ka Lamin South Anganwadi Centre, ka Aidaroy Khyriem na Thangbuli Dongwah-I Anganwadi Centre bad ka Basi Lisa Khonglah kum ka jingithuh ïa ka jingtrei shitom jong ki na ka bynta ka koit ka khiah ki khunlung bad khynnah.
Ka Pdengshakap Primary Health Centre (PHC) kala ïoh ïa ka jingithuh na ka National Quality Assurance Standards (NQAS) Certification ha u Jylliew 2026, ha kaba kala ïoh 91.5% bad kala shah pynkup burom ha kane ka sngi.
Ka Banrilang Christine Kongwang, Community Health Gender Activist na shnong Darrang kala shah pynkup burom halor ka jingpynshlur jong ka ïa ki khynnah ban leit Check-Up bad ban ïarap ban lap ïa kito kiba shitom klong snam ban pynïoh jingsumar ei hapoh ka Rashtriya Bal Swasthya Karyakram (RBSK).
U Dr. Arwin Khonglah, Sub-Divisional Medical & Health Officer, Amlarem Sub-Division and Block Programme Manager, National Health Mission, Amlarem Block u la ïoh pdiang ïa ka Award na ka bynta ka Jarain Village Health Council (VHC) kaba dei ka VHC kaba treikam bha hapoh ka Amlarem Block naduh ka jingai tika, ka jingbuddien ïa ka koit ka khiah ki longkmie pun khun, bad ka jingleit jngoh ïa ki longkmie pun khun kiba don ha ka jingma.
Shub shuh la pynkup burom ruh ïa ka Mir Jingmutlang Cluster Level Federation Women SHG Multipurpose Co-operative Society Ltd kaba don 230 tylli ki Self-Help Group ha kaba 2,123 ngut ki dei ki kynthei.
Haba ïadei bad ka jingsam rashon ne Public Distribution System, la pynkup burom ïa u Mechanki Syngkon, FPS Dealer ka Lailyngdoh FPS Centre ha kaba u la pyndep 100% ka e-KYC hapoh ka NFSA.
Halor ka pule puthi la pynkup burom ïa u Leadingstar Maria Lamin na Jawaharlal Nehru Memorial Secondary School, Lamin, uba la wan ha ka kyrdan 19th Position jong ka thup Top 20 SSLC 2026.
Ha Hima Shangpung, Laskein C&RD Block pat ïa ka lama lai rong ka ri la pynher da ka Kong Ampareen Lyngdoh bad shim salute ruh ïa ki 18 tylli ki kynhun kiba ïashim bynta ha ka March pass ha madan Hula Moosyiem, Shangpung.
La sam khusnam best march pass sha ka Lummuro Higher Secondary School, ba ar Shangpung Presbyterian Higher Secondary School bad ba lai ka Shangpung Higher Secondary School Nongrim, Shangpung.
Katba ha East Jaiñtia Hills la wan pynher ïa ka lama lai rong ka ri da u Ma Wailadmiki Shylla, Myntri ka Sorkar Jylla ha madan Holy Family Parish, Khliehriat, East Jaiñtia Hills District.
La don 36 tylli ki kynhun kiba ïashim bynta ha ka parade kynthup ki Pulit, ki skul, College bad ki NCC.
Ha kane ka sngi la donlang u MLA ka Khliehriat Constituency Ma Kyrmen Shylla, nalor u Deputy Commissioner, ki heh pulit ka district bad ki ophisar nalor ka jingsakhi lang ki paidbah ba bun.
