Shillong, Nailar 16
Ka jingkyrduh kam hapoh ka jylla ka la pynlong ïa ki samla napoh ka jylla ba kin hiar man ka taiew ban leit bylla sha Bangalore, kaba hap ha jylla Karnataka, India.
Haba ïakren bad u samla Donboklang Nongphut uba dei u President ka KSU Bangalore Unit u la ïathuh ba la jan man ka taiew ki samla Khasi na Meghalaya ki la wan poi sha Bangalore ban wan bylla ha ki jaka bam bad ki company.
“Ngam tip na kaei ka daw ba ki bun ki samla ki wan bylla shane namar dang ha kine ki bnai ba la dep ruh ki don ki samla na Mawlai kiba la shah thok haba ki wan bylla ha ki company,” u la ong.
U la ïathuh ba ki don ki samla kiba don kumba hynniew ngut kiba la ïoh jingkular ban siew arphew hajar tyngka shi bnai hynrei ynda ki la poi ha Bangalore ki ïoh tang shiphew haduh khadar hajar da kaba ai daw ba ki la shah ot ha kiba bun ki jingdonkam.
Shuh shuh u la ïathuh ba don ruh kiba dei shi kurim kiba la wan bylla lang sha Bangalore.
Haba kylli na kaei ka daw ba ki bun ki samla ki leit bylla sha Bangalore, ka daw ka dei namar ka suiñbneng ka kham pyngngad lada ïanujor sha Chennai, Delhi bad Mumbai, nangta ka bylla ruh ka bun bad ka ktien ka thylliej ki dang ïa sngewthuh lada sah ha jaka sah.
“Watla bun ka jingshah thok haba aikam hynrei ngam tip balei ki dang ïa wan hynrei kum u nongïalam ka KSU Bangalore unit lada ki wan ujor ngi ai jingïarap ïa kaba lah hynrei ïa ka bym lah ngi pyntip sha kiba haïing jong ki,” u la ong.
Ha ka juh ka por u la pyntip ba kito ki samla na Mawlai kiba la poi trei ha company kiba la shah kular siew pisa kaba khamheh mynta ki la mih ki la leit wad bylla noh shawei.
Kumban shu pynkynmaw u samla Kwis Sumer uba na Muktapur uba dang shu wanphai ïing ha kane ka taiew ba la lah, u la leit sha Bangalore mynshem bnai ban leit bylla ha kawei ka restaurant hynrei u la jah lynti noh.
