Nongstoiñ, Nailar 16
Hadien ka jingujor jong ki paidbah ha kaba ïadei bad ka jingsdang jot lane sniew jong ka surok Nongstoiñ – Maweit kaba jrong 23 KM, ka Hyn-ñiewtrep Youth Council (HYC) Maweit Circle ha kine ki khyndiat sngi ba la lah ha ka jingïalam u samla Shemphang Tyrsa, President bad u samla Maximilando Umiong General Secretary ha ka jingdonlang u Samla Lumlang Kharsyiemlieh President HYC West Khasi Hills District ka la leit ban kynduh ïa u Executive Engineer, PWD (Roads), Nongstoiñ.
U Samla Shemphang Tyrsa haba kren sha ki nongthoh khubor u la ong ba mynta katei ka surok ka la sdang ban jot ha ki katto katne ki jaka, kumta ka seng ka kyrpad ïa ka ophis PWD ban shimkhia noh mardor ban maramot namar ka surok kan sa jot shuh shuh bad kan ktah jur ïa ki nongleit nongwan.
U la pynpaw ruh ba katei ka surok ka long ka jingim jong ka paidbah ka thaiñ Maweit, kumta ka seng ka la kyrpad ïa ka Sorkar bad ïa ka PWD ban shimkhia na ka bynta ka bha ka miat jong ki paidbah khnang ba kane ka surok kan ym jot bun shuh. Shuh shuh u la ong ruh ba halor kane ka surok ha ka jingïakynduh bad u EE u la kular ban shimkhia ban leh ïa kaba donkam.
Nangta, u la ong ruh ba ka seng ka la ïakren ruh na bynta ka jingkieng Risiang kaba la jot bad kaba la pei thliew, ha kaba kala buh jingeh ïa ki paidbah ka thaiñ lada kane ka jingkieng kan dkut ha kano ma kano ka por.
Shuh shuh u la ong ruh ba na ka liang ka u Executive Engineer u la ïathuh ba ym lah shuh ban maramot ïa kane ka jingkieng namar kala jot palat watla katta kin ïai ïakren sha ki bor ba halor namar ka la i donkam eh ban ïoh noh da kaba thymmai.
