Shillong, Nailar 16
Ka shnong Mynriang ba hap hapoh ka Mawryngkneng C&RD Block, East Khasi Hills, kala rakhe ïa ka Independence Day ka Ri ha ka rukom kaba pher bha da kaba pynlong ïa ka Watermelon Festival ba shisngi, ka tamasa ba nyngkong eh ban long ha Jylla.
Kane ka tamasa kala khring ïa bun bah ki briew ym tang na ka shnong Mynriang hynrei na kylleng ki jaka, kaba la lah ban pynïaid ïew ïa u soh watermelon uba la rep hi da ki nongrep ka shnong Mynriang.
Ïa kane ka tamasa la pynlong da ka Dorbar Shnong Mynriang ha ryngkat ka jingïatreilang bad ka National Peoples’ Party Farmers Front. Ka jingthmu jong ka tamasa ka long ban kyntiew ïa ka shnong ka thaw bad ka ïoh ka kot ki nongshong shnong nalor ban pynpaw nam ïa u soh watermelon ba pynmih ka shnong.
Nalor u soh watermelon ki paidbah kila wanrah ruh ïa ki jingri jingdup, ki soh bad ki jhur ba ki thung hi kum u Sohtrun, ki pathaw, ki syiar bad kiwei kiwei.
Ka shnong kum shi bynta ban lah ban pynïaid ïew ïa une u soh kila khot lang ruh ïa ka seng ki nongkhaïi jhur ki ban ïarap bad plie lad lem ïa ki paidbah nongrep soh jong ka shnong ba kin lah ban pynïaid ïew ïa u soh uba ki thung hi.
Na ka liang ki paidbah nongrep da ka dur ba phuh sam rkhie katba dang lut ki soh na ki dukan, mar kila phah leit kheit biang na lum ban wanrah sha kane ka tamasa namar ka jingtuid jong ki paidbah ban thied ia une u soh ka jur bha.
Na ka liang u Bah Bristar Mawthoh bad u Bah Dundee Cliff Khongsit kiba wan ban mih khmat na ka seng ki nongkhaïi jhur kila pynpaw ba ki kloi ban ïarap ïa la ki jong ki paradoh parasnam na ka bynta ban pynïaid ïew ïa u soh jong ki.
Shuh shuh kila kyrpad ïa ki paidbah ba kin thung da ka jingkhein, ïoh long kumba jia ïa ka dor u kubi namar ba la bun than eh kiba pynmih kumba la jia mynta u snem ha kaba la hap ban shu sam ei sha ki briew namar ka jingbym ïaid dor.
Katba u Chairman jong ka NPP Farmers Front u Bah Himalaya M Shangpliang haba kren u la pynpaw ba tang na u soh Watermelon, ka shnong Mynriang mynta kala paw nam bha bad ka long kaba donkam ban pynlong ïa kum kane ka tamasa man la u snem khnang ba ki nongrep ki kiew irat ha ka ïoh ka kot.
U Bah Shangpliang u la ong ruh ba la shem snem un pyrshang ban pynkohnguh ïa u Myntri Rangbah ka jylla Conrad K Sangma ban wan hi ha kane ka shnong ban wan mad ïa u soh water melon.
U la kular ba un sa ïakren bad u Myntri Rangbah halor ka dorkhas ba la ai da ka shnong halor ka jingdonkam, kum ka jingpynïaid ïew ïa une u soh, ka cold storage khnang ba u soh un neh slem bad kiwei kiwei de ki jingdonkam.
