Shillong, Nailar 16
Ka jingai por ka Hynñiewtrep National Youth Movement (HNYM) Ri Bhoi District kaba 15 sngi ïa ka Sorkar Jylla ka la kut, ka seng ha ryngkat ka HNYM CEC, ka la pynlong da ka jingïalang paidbah ha ïew Mahati.
Ha kane ka jingïalang la wan lang da u President ka HNYM, kata u Bah Louis Dohtdong bad kiwei kiwei de ki nongïalam.
Haba kren ha kane ka jingïalang, u Bah Louis Dohtdong u la pynpaw ka jingsngewkhia halor ka jingeh kaba ki paidbah ki ïakynduh bd ki hap ban mad, namar ka jingbym don doktor ha katei ka jaka sumar.
U la ong ba ki nongïalam ka HNYM ki la leit peit ha jaka sumar ha Mawhati PHC, ha kaba ym shym la don doktor, bad kumno ki paidbah kin phah sumar ha kata ka PHC haba ym don doktor, hynrei ka Sorkar ka dangïoh thiah lyngngai.
U la kynthoh ruh ïa ka Sorkar Jylla ba la ïalam da u Conrad K Sangma, Myntri Rangbah ka Jylla, ba ka Sorkar ka leit ai jingïarap pynban sha Assam, namar u sngew synei ïa ki paidbah Assam kiba la ngat ha ka jingshlei um, katba ha Jylla lajong um shym la don ka jngsngew synei wat tang khyndiat ruh.
Hadien ba la khih ka seng, u MLA ka thaiñ u la ong ba la shimkhia halor kane ka kam na ka bynta ki paidbah, bad ka Sorkar ka la pynmih ka hukum ba u doktor un sa wan noh ha PHC Mawhati, da kaba kynnoh ba kadei ka hukum kaba la leh kyrkieh ha ka 13 tarik u Nailar 2026.
“Ym tang katta hynrei la bthah ruh ïa u ne u doktor, ba un trei tang 11 bnai. Kaei kaba ngi sngewlyngngoh ka long, ba ka Sorkar ka phah pule ïa ki doktor sha bar, hynrei ynda ki la pass, kine ki doktor kim treh ban trei ha nongkyndong. Ko ki doktor lada phi dei u doh u snam jong ka hynñiewtrep sngewbha ban trei ha nongkyndong,” la ong u Bah Louis.
