Shillong, Nailur 13
Ka jingsaphriang jong kawei ka durkhih ha ki rynsan ‘social media’ kaba la paw halor ka jingshah thombor jong uwei u khynnah rit ha ki katto-katne ngut ki khynnah kiba la suba ba ki lah ban dei hapdeng kajuh ka rta.
Katkum ki jingsuba la kynnoh ba kane ka jingjia ka la jia ïa uwei u khynnah jong ka skul St. Anthony’s Higher Secondary School, Shillong ha kaba ha ka durkhih la sakhi ba ki khynnah kiba thombor ïa une u khynnah, ki la phah ïa u ban doh ïa ka juti jong uwei napdeng kine bad ruh sa ka shoh ka dat ïa une u lanot uba don marwei hapdeng ka jingshah ker kut ha katto-katne ngut ki khynnah.
Haba buddien halor kane ka jingkynnoh bad haba ïoh ban ïakren bad u Principal jong ka skul St. Anthony’s Higher Secondary School, Shillong, na ka liang u Fr. Anthony Kharkongor u la ong ba ma u ruh u la dap da ka jinglyngngoh hadien ka jingïohi ïa ka durkhih kaba la saphriang namar ba ha ka 7 tarik u Nailur ka la don ka jingïakob phainal jong ka ‘Inter School Basketball Tournament’ ba la pynïaid da ka Don Bosco ha kaba ha kane ka jingïakob, la khot sngewbha ïa ki skul bapher-bapher kiba don hapoh ka nongbah ban ïashimbynta ha ban wan peit kai ïa ka jingïakhun.
Hynrei katba ka jingïalehkai ka dang ïaid, u Fr. Anthony u la ïathuh ba u la ïoh jingtip ba ka la don ka jingïashoh shadien jong ka madan hynrei ki dei tang ki khynnah kiba dangrit. Haba pyrshang ban wad jingtip halor kane, ym shym la tip ki dei ki khynnah skul jongno namar ba ha kane ka sngi, ki la don bun ngut ki khynnah skul kiba la ïa wan ha katei ka sngi.
Na ka liang ki pulit mar ïa ïoh jingtip halor kane ka jingjia, ki la leit sha kane ka jaka bad ki la rah noh ïa kine ki khynnah sha thanat na ka bynta ban pynlong ïa ka jingtohkit. Na ka liang ki pulit ki la khot ruh ïa ki kmie ki kpa jong baroh ki khynnah kiba donkti ha kane ka jingïashoh.
“Ki dei na ki skul kiba don ha kylleng-kylleng bad ki don ruh kiba la kam ba ki dei na ka skul jong ngi hynrei kim dei pat, ki la shu thok bad lehse, ki shu kwah pynbudnam ïa ka skul jong ngi hynrei katkum ka jingïoh jingtip jong nga, kiba bun ki khynnah ha kato ka durkhih ki dei ki Garo bad ki Bengali”, la ong u Fr. Anthony.
Shuh shuh u Fr. Anthony u la ïathuh ba mar sien ïohi ïa katei ka durkhih kaba la saphriang kylleng-kylleng, u la leit ban kylli bad wad ïa ki khynnah kiba dei ki Garo bad Bengali kiba la paw ha ka durkhih hynrei um lap satia ïa ki ba kin dei napoh ka skul.
U Fr. Anthony u la ong ba namar ka jingsaphriang jong katei ka durkhih kaba la kynnoh ba katei ka jingjia ka la jia ha ka skul St. Anthony’s ka lah ban pynjah burom bad pynhiar kyrdan ïa ka nam jong ka skul ha kaba na ka liang ki kmie ki kpa ruh kin don ïa ka jingartatien bad ka jingduh jingshaniah ha ka skul.
U Fr. Anthony u la ong ba kum kine ki jingjia kim ju jia satia ha ki jingïalehkai ha ki por kiba la dep, namar kata u la kyntu ïa ki kmie ki kpa jong ki khynnah skul ba kin long kiba husiar namar ba ha kine ki sngi kiba mynta, kiba bun na ki khynnah kiba ju leh ïa kum kine ki kam ka dei na ka jingbym don por ki kmie ki kpa ban sneng ban kraw bad ban pyni ïa ka jingieid.
