Nongstoiñ, Nailur:
Ka Hynñiewtrep Youths’ Council (HYC) Laitkseh Area Unit ha ryngkat ka jingsynran ki Nongïalam ka HYC Nongstoiñ Circle lem u Sordar ka shnong Phyllut bad ki ‘riew rangbah ka shnong ha ka Sngi Balang ki la hiar ban jurip ïa ka jinglong-jingman ka surok na Marngor shaduh Phyllut. Ha kane ka sngi la don lang ruh ki ophisar ka tnat PWD ba kynthup ïa u SDO bad JE.
Ka kyrwoh khubor na ka HYC, ka la pynpaw ba ha kane ka jingleit jurip ki la lap ba ka kontraktor ka la trei suki bad torti ïa kane surok ha kaba kam pat lah ban pyndep ïa ka kane ka surok kaba jrong 4 kilometre la palat 5 snem.
Shuh shuh ka HYC ka la ong ruh ba ka seng ka ïeng ha kawei ka nongrim bad ban dawa ïa ka kontraktor ba ka dei ban pyndep noh hapoh une u snem hynrei kan ieh ha ka jingstad jong ka ophis kaba dei khmih la kan pynkut (cancel) noh ïa kane ka jingtrei lane kan dang ailad ïa ka kontraktor ba kan pyntrei.
Ka HYC ka la phah ruh ïa ka kyrwoh kaba shai da kaba ong ba ka jinglong jong ka surok ka dei ban long kaba bha naduh ki nala haduh ka rukom siang ïa ka rong ba ka dei ban long kaba bha bad skhem bad dei ban pyndep noh hapoh une u snem.
