Nongstoiñ, Nailur:
U District Magistrate (DM) ka West Khasi Hill District, u Bah Garod LSN Dykes, IAS, u la pyntreikam da ka kyndon 163 of BNSS 2023 kaba khang bad mana ban pyndonkam da ki kynja plastik kum ki pla plastik kiba duna ïa ka 120 micron, ki pla plastik ban rah jingrah ba duna ïa ka 60 GSM.
Nalor kitei, la khang ruh ban pyndonkam ki plastic sheet ba pyndonkam ban thep ban song jingsong ba duna ïa ka 50 microns, ki pela, ki klat, ki pliang, ki straw ki kynja shamoit, ki proh ne ki tari plastic, ki kynja plastic ban pynitynnad kiba shna da u Styrofoam (Thermocol), ki jingkhlong shkor, ki dieng plastic na ka bynta ki balun, ki lama plastic, ki dieng plastic ba pyndonkam ïa ki jingbam thiang, ki plastic dieng ice-cream, ki invitation card ki packet plastic sikret, ki banner plastic bad kiwei kiwei.
Ka kyrwoh na u District Magistrate ka la ong ruh ba la pynmih ïa kane ka jingmana namar ka jingpyndonkam ïa kine ki kynja plastik ka dang ïai bteng wat hadien ba la dep ban khang pyrshah da ki bor ba dei khmih bad ruh ka jingpyndonkam ïa kine ki kynja plastic ka wanrah ruh ka jingma ïa ka mei mariang. U la ong ba kane ka hukum kan treikam mardor tad ynda pynbna da kumwei pat.
