New Delhi, Nailur 15
Ka Sorkar National Democratic Alliance (NDA) hapoh ka jingïalam u Narendra Modi kum u Myntri Rangbahduh ka Ri, ka don jingangnud ban pyntreikam noh ïa ka ‘One Nation One Election’ ne kawei ka ri kawei ka ilekson ha kane ka samoi treikam, la ïathuh ki tyllong khubor.
Lah ban pynkynmaw ba u Narendra Modi, u la dep ban kdew ruh ïa kane ha ka jingkren jong u ha ka sngi laitluid jong ka Ri mynta u snem ba ka sorkar ka angnud ban pyntreikam ïa kane.
Ha kaba ïadei bad kane, ka sorkar ka la dep ban thaw ïa ka komiti hapoh ka jingpynïaid jong u President barim u Ramnath Kovind, kaba la ai ïa ka kaiphod jong ka. Ka panel ka la ai jingmut ban pynlong lang ïa ka ilekshon na ka bynta ka Lok Sabha bad ki Dorbar Jylla kum ka sienjam kaba nyngkong, ha kaba yn bud sa ki jingthep vote ba ïadei lang hapoh 100 sngi.
Wat na ka liang ka Law Commission ka lah ban sa ai jingmut shen. Ka Commission ka lah ban ai jingmut ba baroh lai tylli ki kyrdan Sorkar kata ka Lok Sabha, ki Dorbar Jylla bad ki bor shnong kum ki Municipality bad ki Panchayat kin don ïa ka jingthep vote ha kajuh ka por ka ban sdang naduh u snem 2029.
Ha ka jingkren jong u ha ka sngi laitluid ha u bnai ba la dep, u Modi u la kren tyngeh na ka bynta “Kawei ka ri, kawei ka ilekshon”, da kaba kynthoh ba ka jingthep vote kaba man ka por ka buh jingeh ha ka jingkiew jong ka ri.
Ka BJP ka la kular ruh ïa ka “One Nation One Election” ha ka mat ïalap ilekshon jong ka bad ki tyllong khubor na ka sorkar ki la ong ba ki don ka jingkyrmen ba kan don ka jingïasngewthuh jingmut hapdeng baroh ki seng ban pyntreikam ïa ka, la ïathuh ki tyllong khubor.
Hynrei ka Liang Pyrshah ka la pyrshah jur ïa katei ka jingmut haduh mynta, da kaba pynpaw pyrthei ïa ki mat riti synshar.
Ki jingeh ha kaba pyntreikam ïa ka kin kynthup ïa ka jingpynïadei ïa ki por ilekshon ryngkat bad ka jingpynthut kaba duna eh ïa ka jingsynshar bad kam don ka jingshai ban ïadei bad ki jingpynsangeh ki ban don bynta ha kaba wanrah ïa baroh ki jylla ha kajuh ka por. Ka don ruh ka jingbym shai kaba paw ha ka lynti ban ïaid shakhmat ha ki mukotduma kiba ïadei bad ka jingpynkhyllem ïa ki ïingdorbar, ka jingsynshar jong u President, ne wat ka ïingdorbar ne ïingdorbar ba la pynsangeh.
