Shillong, Nailur 15
Ka Manipur Elders’ Consortium Shillong (MECS) ha ka Sngi U Blei ka la pynlong ïa ka jingïakhih shong kyllaiñ mungor kum ka dak ban pyrshah halor ka jingshah thombor ki jaidbynriew Metei ha Manipur.
Ïa kane ka jingïakhih shong kyllaiñ mungor la pynlong ha Manipuri Rajbari, Shillong.
“Kane ka jingïakhih shong kyllaiñ mungor ka long kum ka jingpyrshah halor ki kam thombor ïa ki jaidbynriew Meitei ha Manipur. Ngi la mad jingeh shi kat dei la shi snem mynta namar kane ka jingïakynad. Ki shnong Meitei ki shah thombor lyngba ka jingpynhap bom na suiñ,” ong u President ka MECS, u Munish Singh haba kren sha ki lad pathai khubor.
Kum ban shu kdew hangne, la kynnoh ba ki lehnoh Kuki dang shen ki la pynhap ‘bomb’ ha katto-katne ki shnong ha Manipur da kaba pyndonkam ïa ki ‘drone’.
Haba kdew ba ki Meitei ki dei ki briew kiba ïajan bad kiba don ïa ka mynsiem shipara, u la ong ba kum ka jaidbynriew kam ngeit satia ha ki kam lehnoh.
“Nga kyntu ba dei ban sangeh pynïap ïa ki Meitei ba lui-lui ha ki shnong ki thaw. Kiba lui-lui ki la kylla long sakma ha Manipur. Kumta kane ka dei ban sangeh shi syndon, bad ngi na ka liang ka MECS ngi kwah ban kyntu ïa baroh kiba don ka jingsngewkhia ban sngewbha ban peit ba ki Meitei ba lui-lui kin ym shah pynïap ha Manipur,” ong u Singh.
Haba kylli, u la ong ba ka Manipur ka don ïa ka khappud kaba jrong 352 km bad ka Myanmar bad ka bym biang ka jingker; ha kawei ka liang kaba pynsuk ïa ka rung ka mih jong kiba nabar-ri na shiliang ban rung be-aiñ sha Manipur.
Utei u nongïalam haba kdew ba katei ka dei ka mat kaba la slem bah, u la kynnoh ba ha ka jingshisha, ka jinglong-jingman ba mynta ha katei ka Jylla baroh ka dei namar ka jingwan rung be-aiñ kiba na shiliang Myanmar bad namar kane, la mih sa kawei pat ka jingeh – ‘narco-terrorism’ ne ki kam khaïi drok bad ka jingrep ‘poppy’ ha ki jaka lum ka Manipur kaba long be-aiñ.
“Hap ban pynsangeh shi syndon ïa kane bad ka Sorkar ka dei ban leh eiei pyrshah ïa kiba kum kine ki kam be-aiñ ha Manipur,” u la ong.
Halor ka lad jingpynbeit ïa kane ka jingïakynad kaba la neh la palat shi snem, u Singh u la ban jur halor ka jingdonkam ïa ka jingsnohktilang jong ki ‘riew paidbah.
“Mynta kiba bun ki samla na Manipur ki sah shabar ka Jylla namar ka kam bad ka jingpule jong ki…ki donkam ba wan lang. Ngi donkam ban pynbor ïa ka Sorkar ban wanrah biang ïa ka suk ka saiñ,” u la ong.
Na ka liang jong u, u la pynpaw ba ka jinglong-jingman hapoh ka Jylla ka la buh jingeh ruh ïa ki samla kaba la ktah shi kat dei ïa ka pule-puthi jong ki khamtam namar ka korphiw, jingkhang ‘internet’ nalor kiwei-kiwei.
Shuh shuh haba jubab, u la bynrap, “Ngim lah ban ong halor kata namar mynta la palat shi snem. La dei ban pynbeit ïa kane la slem bah. Kumta ngi kyntu ïa ka Sorkar ban kham pynleit jingmut bad ban shim ki sienjam ba kham pyrkhing ban ïakhun ïa ka jinglong-jingman kumjuh ban wanrah biang ïa ka suk ka saiñ ha Manipur.”
