Shillong, Nailur:
Ka Samla Seng Khasi Riwar Mihngi Tnat Shillong kan pynlong ïa ka jingïakynduhlang bad Seminar-2024 jong ki khun samla ka thaiñ kiba shong basah ba pule dangle bad batrei-baktah ha Shillong ha ka 6 tarik, Risaw, 2024 ha Seng Khasi College, Jaïaw, Shillong ha ka por 10:00 baje mynstep haduh ka 5:00 baje janmiet.
Ha katei ka sngi yn sdang shwa da ka jingkyntiew lama ka Seng ha ka por 10 baje mynstep ban bud pat sa ka prokram Seng Pyni ha ka por 11 baje halor ka phang” Ki samla ka Seng Khasi bad ka Lawei-Ka Niam, Ka Juk bad ka Ri” ha kaba yn ai jingkren jingpynshai da ki riewrangbah bad ki longkmie bad yn bud pat sa ka jingïalang paidbah ha kapor 2 baje nohphai sngi. Kumta la khot la werlang ïa baroh ki para thaiñ Riwar kiba shong basah, ba pule bad batrei-baktah ha Shillong.
Ki longkmie ki longkpa ki samla-samhoi ki heprit, ki parakur-para kha paralok-parajor kumjuh ruh ki para riewseng kiba na kiwei pat ki Tnat Seng Khasi bapher bapher ban ïawan pynshngaiñlang ha katei ka sngi ba kan phuh kan phieng ka jingïakynduhlang ki khun samla jong ka thaiñ Riwar Mihngi.
