Shillong, Nailur 16
U Myntri ka tnat pule puthi ka Jylla, u Rakkam A Sangma u la ong ba ka Sorkar Jylla kam tieng satia ban pyni kam bad leh eiei ïa ki skul SSA bad kiwei ki skul kiba don khynnah skul tang hapoh 10 ngut.
U Rakkam u la ong ba ka Sorkar kam tieng ban pyni da ki kam bad leh da kaba tyngeh ïa ki skul SSA bad ïa kiwei ki skul kiba don tang hapoh 10 ngut ki khynnah.
U la ong ba ki ophisar ka tnat pule puthi ki dang leit wad jingtip shuh shuh kum ka jingpynshisha bad ki don ruh ki skul kiba la dep ban leh eiei.
Ha ka jingshisha, ki la don da ki spah tylli ki skul kiba la lap mynta la katto-katne snem kiba don tang hapoh 10 ngut ki khynnah skul kaba long ka jingduhnong ïa ka Sorkar Jylla.
U Rakkam u la ong ba ka tnat pule puthi ka pynkhreh lypa ïa ki lad ki lynti da kaba shim ïa ki nonghikai bad buh shawei pat lada shah khang noh ka skul kaba ki hikai.
Une u Myntri u la ong ba ki nonghikai ki dei ban hikai bad shakri hok ïa ka kam namar lada kim kwah ban long nonghikai ki lah ban trei da kiwei pat ki kam.
“Kito ki bym kwah ban long nonghikai ki dei ban trei da kiwei pat ki kam kum ki kam lajong ne kiba kwah trei ha ka saiñ hima sima namar lada kim biang ki nonghikai ka pule puthi ka shah ktah,” la ong u Rakkam haba pynpaw ruh ka jingsngewkhia halor ka jinghiar ka pule puthi bad jingbun kiba pep skul shiteng por.
U la ong ba ka tnat pule puthi ka la dep don lypa ki jingtip bad yn sa leh ïa kaba donkam ïa kito ki skul kiba don hapoh 10 ngut ki khynnah skul.
