Shillong, Nailur 16
Da ki phew snem ki la don da ki spah tylli ki skul kiba don khynnah skul tang hapoh 10 ngut kiba la bteng ban treikam ha kane ka Jylla kaba long ka jingduhnong ïa ka Jylla bad kham bun na kine ki skul ki dei ki skul Samagra Shiksha Abhiyan (SSA).
Ka Sorkar Jylla mynta ka don jingthmu ban shim ki sienjam ban leh eiei na ka bynta ka jingbha ha ka pule puthi.
Katkum ka jingai jingkheiñ ka Sorkar, ki don 904 tylli ki skul ha Meghalaya kiba don ki khynnah skul tang hapoh 10 ngut. Na kine ki 904 tylli, 353 tylli ki dei ki skul SSA bad 133 tylli ki skul Sorkar, 214 tylli ki skul ba ïoh jingïarap na ka Sorkar (government aided) bad 204 tylli ki dei ki skul shimet.
Kane ka jingbym leh eiei ki Sorkar ha ki snem la leit noh ka la buh jingeh ïa ka Sorkar ba mynta.
Ha West Garo Hills, na ki 228 tylli ki skul, 58 tylli ki dei ki skul Sorkar, 86 tylli ki SSA, 50 tylli ki skul ba ïoh jingïarap na ka Sorkar bad 34 tylli ki skul shimet.
Ha East Khasi Hills, ki don 132 tylli ki skul ha kaba 10 tylli ki skul Sorkar, 39 tylli SSA, 25 tylli kiba ïoh jingïarap na ka sorkar bad 58 tylli ki skul shimet.
Ha kiwei pat ki district, ki skul kiba don khynnah tang 10 ngut ki long ka East Garo Hills – 28 tylli ha kaba 8 tylli jong ka Sorkar, 11 tylli SSA, 6 tylli kiba ïarap ka Sorkar bad 3 tylli ki.dei ki bym jingïarap eiei.
Ha South Garo Hills ki don 89 tylli, ha kaba 50 tylli ki dei ki SSA.
Ha West Khasi Hills ki don 92 tylli, kynthup 33 tylli ki skul SSA, 26 tylli ki skul ba ïarap ka Sorkar bad 30 tylli ki skul shimet.
Ha Ri Bhoi, na ki 49 tylli ki skul, 21 tylli ki skul SSA nalor 18 tylli ki skul shimet.
Ha West Jaiñtia Hills, na ki 56 tylli ki skul, 18 tylli ki skul SSA, 21 tylli ki skul ba kyrshan ka Sorkar bad 11 tylli ki skul shimet.
Ha North Garo Hills, ki don 12 tylli ki skul bad ha East Jaiñtia Hills ki don 36 tylli ki skul ha kaba 16 tylli ki skul SSA, 11 tylli ki skul ba kyrshan ka Sorkar bad 5 tylli ki skul shimet.
Ha South West Khasi Hills District ki don 86 tylli ki skul kiba don khynnah skul tang hapoh 10 ngut bad 40 tylli ki dei ki skul SSA bad 17 tylli ki skul ba kyrshan ka Sorkar bad 26 tylli ki skul shimet.
Shuh shuh ha South West Garo Hills, na ki 62 tylli, 21 tylli ki dei ki skul Sorkar, 15 ki skul ba kyrshan ka Sorkar bad 4 tylli ki skul shimet, katba ha Eastern West Khasi Hills ki don 34 tylli ki skul kynthup 12 tylli SSA, 11 tylli Sorkar bad 7 tylli ki skul shimet.
