Shillong, Nailur 16
U Myntri Sorkar u Rakkam A Sangma u la ong ba ka jingïakhun ha ka ilekshon MLA shiteng samoi ha Gambegre konstitwensi kan dei hapdeng ka NPP bad TMC, ym bad ka Congress namar kane ka seng kam don lawei shuh.
U Rakkam u la ong ba haduh mynta kaba paw ka long ba ki paidbah ki kham ïakren ïa ka NPP bad TMC tangba ka jingjop ka noh sha ka NPP.
U la ong ba u la leit ban ïalap ilekshon la lai sngi bad u sngewthuh ïa ka jingsngew kaba don ha ki paidbah.
Wat la ka Gambegre ka dei ka bhah jong ka Congress namar la mihkhmat da u Saleng A Sangma ha shwa ban shahjied kum u MP, u Rakkam u la ong ba ki briew kim ïakren ïa ka Congress namar kam don lawei shuh bad ki paidbah ki sngewthuh bha lada jied ïa ka Congress ne TMC ki don ha ka Liang Pyrshah hynrei lada jied ïa ka NPP ka don ha ka liang jong ka Sorkar bad shibun ki kam pynroi kin wan.
Halor ka jingong u nongïalam ka Liang Pyrshah bad ki kam pynroi ki tuid kyrpang tang ha ka por ilekshon, u Rakkam u la ong ba ka Liang Pyrshah kan wad daw beit lada trei ruh kan ong beit ba noh shiliang.
Namar kata, u la ong ba ka NPP kan ïoh jingjop ha kane ka kynti lyngba ka kyrtong jong ka seng ka Mehtab Chandee A Sangma.
