
Shillong, Nailur:
U Bah Banshai Marbaniang uba dei u President ka Meghalaya Awaken Concern Citizens (MACC) Sengkmie bad uba bat ruh kum u Chairman jong ka Awaken India Movement (AIM) ka Jylla Meghalaya, u la ong ha ka jingsakhi la ïohi ba baroh ki seng saiñ pyrthei hapoh ka Jylla kim ju kren eiei hapoh ka ïingdorbar thawaiñ ka Jylla halor ka jingkiew dor ki marbam mardih kaba la pynsah ïa ki paidbah hapdeng ka umdum.
Na ka liang U Nongsaiñ Hima haba ïoh ban ïakren bad u Bah Banshai Marbaniang ha ryngkat ka jingïadonlang jong u Secretary bad u dkhot ka MACC, u la ong ba na ka liang ka kynhun kaba kit ba bah ïa ki jingeh jong ki paidbah ha baroh ki liang, ka la phah da ka jingthoh sha ki 59 ngut ki MLA ka Jylla ba kin kren bad leh eiei halor kane ka khia ka shon jong u paidbah hapoh ka Ïingdorbar Thawaiñ ka Jylla bad la ïohi ba ïa kane ka mat, la rah tang da u MLA ka Voice of the People Party(VPP), u Bah Ardent Miller Basaïawmoit.
U la ong ba ki seng saiñ pyrthei ki pyrshang ban shim rai dalade na ka bynta ka jingmyntoi shimet ka jong ki kata ka mut ka dei kaba ki pyrshang ban pynkheiñ noh khlem da ñiew dor shuh ïa ka bor Synshar jong ngi ki paidbah (Democracy) halor ka lynti kaba kum ki paidbah ki dei ban jied katkum ka bor Synshar ba la pynkhamti ne khlem da sngap shuh ruh halor kumno ba ki paidbah ki dei ban kren. “Haba ngi ïohi ïa ki ‘Political Party’ kiba pyni ïa ka bor Synshar ba ki don da kaba shu byrngem ne kynthoh markylliang ka long ka jingshim kabu tang ban myntoi shimet da kaba ïuhroit ïa ka hok jong ngi ki paidbah kiba jied bad ruh da kaba pynkheiñ noh ïa kiba bun ki bynta jong ki paidbah kumba ngi don”, ong u Bah Banshai.
U la ong, “Kane baroh kan ïalam sha ka lynti ban pynisih noh ïa ka mon laitluid jong ngi ki paidbah bad ban rai hi noh dalade kum ka ‘Political Party’ tang namar ka jingmyntoi shimet ban ïa ki paidbah kumba ngi long ki nongshong shnong ba pura.”
“Kane baroh ka dei kaba ki leh kumno ban ïaid lait ïa ka hok shimet jong ngi ki paidbah kumjuh ruh da kaba pynkheiñ ïa ka jinglaitluid bad ban pyntlot bor khlem da donkam ban peit ïa ka jingdonkam tang namar ka jingdonkam shimet jong ka seng”, bynrap u Bah Banshai.
U la ong ba ki seng saiñ pyrthei kiba mynta ban kham pynkhlaiñ bor ki pyrshang ban ïuhroit noh ïa ka “DEMOCRACY” da kaba ki wanrah da kawei pat ka jingpyrkhat kaba thymmai kaba la tip kum ka “Party crazy” tang kumno ban pynbieit paidbah na bynta ka jingmyntoi shimet da kaba ki pynklet ba dei ban bret noh îa ka kaba long ka bor synshar jong ngi ki paidbah.
U la ong ba kum ki ‘Political Party’ kim dei ban pyni donbor da kaba lum paidbah da kaba pynibor markylliang bad kane baroh ka long kumba pyni bor kylla ïa ngi ki paidbah ne wat ban pynbor ruh kumjuh haduh ban pyntieng pynsmiej katba mon da kaba pynklet ïa ka bor synshar jong u paidbah.
“Halor ka jingshisha ki ‘Political Party’ ki dei ban shimkhia bad ban ailad halor ka hok bad ka jingshisha jong u paidbah ban pyndonkam katkum ki bynta jong ka bor synshar ba la pynkhamti halor ka Ri Synshar Paidbah kaba long ka Ri kaba Laitluid halor ka bynta kumno ban wanrah kum ka jingkoit jingkhiah bad ban pyntreikam shisha lyngba ka rukom synshar paidbah”, bynrap u Bah Banshai.
U Bah Banshai u la ong ruh ba ka kynhun kan dang ïaid shakhmat ha kaba ïadei bad kane ka mat ha ryngkat ka jingdonkam ruh ïa ka jingkyrshan jong ki seng saiñ pyrthei la ki long na kino-kino ki seng ruh.
Shuh shuh u Bah Banshai u la ong ba la ïohi ba ki seng saiñ pyrthei ha kine ki khyndiat sngi kim shym la burom shuh ïa ki kynhun kiba trei na ka bynta ka bit ka biang jong u paidbah hynrei ki la shim noh ïa kane ka mat halade ban pynkylla kum ka mat saiñ pyrthei ne ka ‘Political Issue’ ha kaba kane ka pynishai kdar ba ïa ka jingsynshar paidbah la shah knieh donbor noh hano-hano.