Shillong, Nailur 16
Ka Voice of the People Party (VPP) ka la dawa na ka Sorkar ban tohkit bad khmih bniah haba ïadei bad ka jingkiew dor ba palat pud khamtam jong ki marbam ba kongsan hapoh ka Jylla.
“Ngi kyntu ïa ka Sorkar ba kan tohkit bad khmih ïa ki daw halor ka jingkiew dor kaba shaba palat, khamtam eh kaba ïadei bad ki marbam ba kongsan,” la ong u General Secretary ka VPP uba long ruh u MP ka Shillong Parliamentary konstitwensi, Dr. Ricky A.J. Syngkon ha ka shithi ba la phah sha u Myntri Rangbah ka Jylla, u Conrad K. Sangma.
U MP u la ban jur ruh ba ka Sorkar ka dei ban pynbeit ryntih bad buddien ïa ka jingtreikam jong ki khyrdop lum khajna bad ki jaka talasi harud ki surok bah – kaba ïalam sha ka jingkiew dor jong ki mar ha ka Jylla.
“Pyntikna ba ki nongrep kim shah pyndonkam bakla ha ki nongpynïaid pdeng bad ba dei ban don ïa ka rukom buh dor kaba beit ryntih ban ïada ïa ka bha ka miat jong baroh arliang, kata ki nongpynmih mar bad ki nongthied na ka jingshim kabu ba khlem nongrim,” u la ong.
U Dr. Syngkon u la kyntu ruh ïa ka Sorkar ban pynkhlaiñ ïa ka tnad Food and Civil Supply, ban pyntreikam ïa ki dor ba la buh da ka Sorkar bad ban weng ïa ki jingpynkheiñ kyndon jong kine ki jingpynïaid dor.
Ka seng ha kajuh ka por ka la kyntu ban pynbeit ïa ki jingeh ha ka leit ka wan naba ka jingkieng Umïam kam long kaba biang na ka bynta ka ïaid ka ïeng jong ki kali heh ba kit mar (kynthup ïa ki mar ba kongsan) sha sor – ha kawei ka liang kaba pynbor ïa ki ban shim ïa ki lynti kiba kham jngai.
“Kane ka lah ban long ka daw jong ka jingkiew dor namar ka jingkiew dor ha ka leit ka wan,” la ong u MP.
Haba kdew ba da kaba buh jingmut ba ka Jylla ka shaniah ha ki marbam na shabar, u la ong ba ka Sorkar ka dei ban wad kyrkieh bad thaw ïa kiwei ki lad ki lynti kiba kham lyngkot ban pynsuk ïa ka leit ka wan jong ki marbam.
“Lada ym shim ïa kine ki sienjam ha ka por kaba biang, kan pynbor ïa ka VPP ban leh eiei, kynthup ka jingbteng ban ïakhih, ban dawa ïa ka hok na ka bynta ki paidbah ka Jylla. Ngi kyrmen ba ka Sorkar kan leh eiei noh kloi ban weng ïa kine ki jingeh bad ban trei ha ka ban pynbiang ïa ki jingïarap sha ki nongshong shnong ka Jylla,” la ong u Dr. Syngkon.
Ha kawei ka liang, haba kyntu ïa ka jingtuklar ba mardor jong ka Sorkar haba ïadei bad kane ka bynta, ka seng ka la ong ba ka jingkiew dor kaba shaba palat ka la buh jingeh shi kat dei ïa ki paidbah nongshong shnong, khamtam ïa u duk u suk bad kito kiba shah iehnoh beiñ ha ka imlang-sahlang.
Ka seng ha ka 13 tarik Nailur, 2024, kum ka dak jong ka jingpyrshah, ka la pynlong ïa ka jingshong kyllaiñ mungor ba jai-jai (ba shi sngi) ha Madan Malki, Shillong ban pynphai khmat ïa ka Sorkar Jylla halor kane ka mat ba kongsan.
Shuh shuh ka VPP ka ngeit skhem ba kum kane ka jingkiew dor kaba shyrkhei ka nang jur shuh-shuh namar ki daw bapher-bapher ba kynthup ïa ka jingdon jong kiba bun ki khyrdop lum khajna ha ki surokbah jong ka Jylla bad ka ri, bad ka jingbym larkam jong ki bor ba dei khmih ban khang lad ïa ka jingshah ban beiñ jong ki nongrep bad ki nongthied-nongpet kumjuh.
“Wat la ki la don katto-katne ki lad ki kabu ïa ka liang pyrshah ban pynsngew ïa kane ka mat ha ka Dorbar Synrai ba dang shu kut, hynrei ym shym la pynleit jingmut bha ïa ka. Kumta, ngim don lad shuh da kumwei pat hynrei ban rah ïa kane ka kam sha surok. Ki paidbah ka Meghalaya ki shem jingeh, bad ka dei ka kamram jong ka Sorkar ban shimkhia mardor ban weng ïa kane ka jingeh,” la ong ka shithi na u General Secretary sha u Myntri Rangbah.
