Shillong, Nailur 16
“Ki dei ki lehnoh, kim dei ki Hindu kito kiba thmu ban ïalap khang doh masi.”
Ïa kine kyntien la pynpaw da u Myntri Sorkar u Rakkam A Sangma haba jubab ïa ka jingkylli halor ka jingthmu jong kawei ka kynhun kaba thmu ban pynlong ïa ka jingïaid paidbah ha Shillong ha ka 2 tarik Risaw, 2024 ban ïalap ñiew ïa ka masi kaba khuid bad kum ka kmie bad ban khang shoh doh ïa ka masi.
Lah ban kdew hangne ba ka don ka jingthmu ban pynlong ïa ka ‘Gau Dhwaj Yatra’ da ka Gau Pratishtha Andolan (GPA), kaba dei ka jingkhih kaba thmu ban khang shoh doh masi bad ban ñiew ïa ka masi kum ka kmie ha ka ri lane ka ‘Rashtra Mata’.
Haba ki nongthoh khubor ki buh jingkylli halor kane ka jingthmu jong katei ka kynhun, u Myntri Sorkar ba dei peit ïa ka tnat pule puthi, u Rakkam A Sangma u la ong, kum kine ki briew ki dei kiba dang sah-biej ha ka pule puthi bad kim dei ki Hindu.
“Ki dei kiei maki ban batai kaei kaba ngim dei ban bam. Ym don mano-mano ba lah ban khang ïa nga ne ïano-ïano ban bam ïa kano-kano ka jingbam,” la kynthoh u Rakkam.
U la ong ban bam dohmasi ym dei satia ban pynïasoh bad ka niam namar ka jingbam dohmasi ka dei ka bynta kaba la don lypa, ki don shibun ki paralok kiba dei ki Hindu kiba bam dohmasi, ki Muslim kiba bam dohmasi. “Ki don ki Khristan ki bym poi Ïingmane hynrei ki dei hi ki Khristan, ki Hindu ki bym leit sha jaka mane ki dei ki Hindu bad ki Muslim ki bym poi sha jaka duwai hynrei ki dei ki Muslim. Kumta kine ki briew kiba thmu ban leh kiei-kiei ki bym donkam ban leh, ban pynkulmar, dei ban ñiew ïa ki kum ki lehnoh,” la ther tyngeh une u Myntri Sorkar.
U la ong ba kim dei satia ki Hindu, ki dei ki lehnoh namar ki Hindu ba shisha kim leh kum kine ki kam bad ki tip ban burom markylliang ïa kiwei. U la bynrap da kaba ong ba ki ‘riewkhraw jong ka ri India kum u Dr. B.R Ambedkar kim leh kum kine kiei-kiei. U Rakkam u la ong ba kine ki kynhun ki dei ban sngewthuh balei kin shu leh ïa kine kiei-kiei ki bym donkam ban leh bad ban leh kum kane ka drama kaba ktah ïa ka jingsngew jong kiwei.
“Nga kyntu ba kim dei ban pynlong kum kine ki prokram bad ki dei ban sngewthuh ïa ka jinglong khraw jong kane ka ri India kaba ïar bad don da ki briew bapher bapher kaba pynlong kawei ia ka ri,” u la ong.
