Shillong, Nailur 16
Ki saw tylli ki Hima kiba don marjan bad u pud u sam jong ka Meghalaya bad Assam kita ka Hima Mylliem, Hima Jirang, Hima Nongkhlaw bad ka Hima Nongspung ha ka Sngi Nyngkong ki la ujor sha u Chief Executive Member (CEM) jong ka Khasi Hills Autonomous District Council (KHADC) u Bah Pynïaid Sing Syiem halor ka jingbteng jong ki briew na Assam ban kam trai ïa ki jaka bad pynthut ïa ki kam pynroi ha ki shnong ha khappud.
Ha kane ka jingwan ai ka jingujor sha u CEM, ki Hima ki la pynpaw ïa ka jingsngewkhia halor ka jingwan rung bad pynthut ïa ki kam pynroi ha ki thaiñ khappud da ki ‘riewshimet na Assam kiba dang ïai bteng jan man la ka por.
Haba kren sha ki lad pathai khubor, u Pa’iem Hamberley Wahlang, u Syiem ka Hima Jirang, u la ïathuh ba wat hapdeng ka jingïakren pud hapdeng ka Meghalaya bad ka Assam ka dang ïaid shakhmat, hynrei ki kam kyntur pud ki dang ïai bteng khlem sangeh. U la kyntu ïa ka KHADC ba kan shimkhia da kaba tyngeh ban weng ïa kine ki jingeh bad ban ïada ïa ka khyndew ka shyiap.
Na ka liang ki nongïalam jong kitei ki Hima ki la pynpaw ruh ïa ka jingsngewkhia halor ka jingbym shym la pan jingmut ne ïasyllok bad ki ha kaba ïadei bad ka kam pynbeit pud kaba la ïaid ha ka bynta kaba nyngkong, kaba la pynsah umdum ïa ki. Ki la ong ba ka jingbteng jong ka Assam lyngba ki tnat bapher bapher ban kyntur sha u pud u sam ka dang ïai bteng beit.
Halor kane, u Bah Pynïaid Sing Syiem kum u CEM u la pynthikna ïa ki Hima ba ka Council kan sa leh ïa kaba donkam halor kane ka jingujor jong ki. U la bthah ïa u Deputy CEM u Bah Pynshngaiñ N Syiem ba un ïasyllok bad ki stad aiñ ka Council ban pynthikna ïa ka jingïada ïa ki khyndew ki shyiap hapoh u pud u sam jong ka KHADC bad ban weng ïa kine ki jingeh ha khappud.
U la ong, ba ki saw tylli ki hima ki dei ki hima kiba ïadon bynta ha ka jaka puta ka khyndew ka shyiap khamtam ba ïadei bad u pud u sam ka jylla Assam. “Ngi la ai jingkular ba kum ka council ngin don ryngkat bad ki hima ha kaba ïadei bad ka kam pud kam sam, bad yn ai jingkyrshan ruh ïa ki Hima ha kaba ïadei bad ka khyndew ka shyiap ha khappud jylla Assam,” la ong u CEM.
U la ong, “Kumba la ai jingmut naduh kaba sdang ban ïadon lang bad ki hima, ngin shim ruh ïa ka rai ba bha tam na ka bynta jong ki paidbah. Ki Hima ki don ka hok ban pynsngew lada ka Sorkar Assam ka dang kyntur pud, ha ka jingshisha haba la don ka jingïakren pynbeit pud, ka Sorkar Assam ka la dei ban burom, hynrei la sakhi ruh ba dang shen ki la wan kyntur pud hapoh ka Hima Jirang.”
