Khliehriat, Nailur 17
Ka Joint Action Commit-tee (JAC) Dong Namchiang, Elaka Narpuh, East Jaiñtia Hills District, ka la ai por artaïew ïa ka sorkar kumjuh ruh ïa ka NHAI ban maramot noh ïa ka surok bah NH-6. Lada ym urlong kane ka jingdawa ki la byrngem ban mih biang sha surok ban ïakhih paidbah.
Ka JAC Dong Namchiang, kiba kynthup ïa ki shnong ha shilynter ka surok bah NH-6, ka la dawa na ka Sorkar bad ka NHIDCL ban maramot noh mardor ïa ka surok NH-6 naduh Tongseng haduh Ratacherra-Malidor namar ka jingsniew tasam kane surok ka la wanrah ruh ïa ka jingsniew ki kali na ka por sha ka por bad ka jingsahkut kali kaba la pynthut shi kat dei eh ïa ka ïaid ka ïeng u paidbah.
Ka JAC ka la ong, “Mynta ka la dei ka por ba rang slap, ka la ktah haduh katta-katta ïa ka koit ka khiah jong ki nongleit nongwan bad ki nongshong shnong khamtam eh ïa ki khynnah skul namar ka surok ka la dap da ka pum pum haduh ba la shem jingeh ban ring mynsiem haba leit ba wan.”
Na ka liang jong ka JAC ka la pynpaw ba na ka por sha ka por ka la ïai ban bad kyntu ïa ka NHAI bad NHIDCL ban maramot noh ïa kane ka surok, hynrei ka jubab kaba ki ïoh ka long ba ki dang pyntrei ïa ki nala (side drain). Ka JAC ka la ong ba katkum ka jinglap jong ka ba ka jingtrei kam jong ka NHAI/NHIDCL ka suki shaba palat bad lada ïai ap haduh ban da dep ka nala, ka mut ba ki paidbah kin ïai bteng ban mad ïa ka jingeh ha ka leit ka wan.
Ka JAC ka ban jur ba ka NHAI ka dei ban maramot noh ïa ka surok bad ban pyndap ïa ki thliew ki syar ha shilynter ka surok katba dang ïaid ka jingshna nala. Ha kajuh ka por ka la dawa ruh ban pynkloi noh ban siang rong (blacktopping) ïa ka surok khnang ba kan pynsuk ïa ka leit ka wan jong ki paidbah.
