Shillong, Nailur 17
U Arvind Kejriwal, uba dei u convenor jong ka AAP ha ka Sngi Ba-ar u la leit ban aiti noh ïa ka shithi iehnoh kam ïa ka shuki Myntri Rangbah ha u Lieutenant-Governor u VK Saxena. Kane ka la wan hadien katto-katne por ba u la pynbna ban iehnoh ïa katei ka shuki.
Kane ka jingiehnoh kam jong u Kejriwal ka la long ruh hadien katto-katne por, ba la pynbna ïa ka nongïalam jong ka AAP kaba dei ruh ka Myntri ka tnat pule puthi, ka Atishi, kum ka nongbujli jong u kum ka Myntri Rangbah ka Delhi.
U Kejriwal, u la pynbna ban iehnoh kam tang hadien ba u la mih na patok, hadien ba u la shah kem ha ka kam thok kyiad ha Delhi, palat san bnai. U Kejriwal, u la pynkyndit ïa ka Ri, haba u la khot ban pynlong ïa ka ilekshon kaba kloi ha ka nongbah jong ka ri, da kaba ong ba un shong ha ka shuki Myntri Rangbah ka jylla, tang hadien ba ki paidbah ka Delhi kin wanrah biang ïa u.
Haba mih hadien ka jingïalang, u Myntri ka AAP, u Gopal Rai, u la ong, “U Arvind Kejriwal, u la aiti ïa ka shithi iehnoh kam jong u, sha u LG jong ka Delhi. Baroh ki MLA, ki la ïa rai lang, ban pynïeng ïa ka Atishi, kum ka Myntri Rangbah ba thymmai.”
Hadien ba la pynkhamti ban bujli bad shimti ïa ka shuki Myntri Rangbah, ka Atishi ki la leit ban rah ka shithi ban pynpaw ka jingkyrshan bad jingbun paid hakhmat u LG ban thaw ïa ka Sorkar ba thymmai ha Delhi.
