Shillong, Nailur 17
U Chairman jong ka Meghalaya Rural Tourism Forum (MRTF) Bah Alan West Kharkongor, u la ïathuh ba ka kam jngohkai pyrthei ha Sohra ka la sdang ban wanphai biang mynta u bnai Nailur 2024.
U Bah Alan u la ïathuh ba ha u bnai ba dang shu dep uba dei u bnai Nailar, ka kam jngohkai ka la hiar shisha namar kiba wan kai ki la duna ban wan sha Sohra naduh ba la shah khang ïa ki kali kiba wan nabar ha jingkieng Umtyngngar kaba la jia ha ka 26 tarik u Naitung 2024.
U la ong ba lada ka don kum kane ka jingshah pyndik jong ki nongjngohkai pyrthei kan ktah shisha ïa ka kamai kajih jong ki briew kiba sah ha Sohra namar ki im jakpoh bad pyndap ïa ka ïing ka sem da kane ka kam.
Shuh shuh u la ïathuh ba haduh mynta ki kali ban kit ïa ki nongjngohkai pyrthei napoh ka jylla ki dang duna kumta ban pynsangeh kynsan kynsan ïa ki, kan ktah pynban ïa ka kam jngohkai pyrthei hapoh ka jylla.
U la ai nuksa ba lada wan ki nongjngohkai pyrthei shi lak ngut lada pynbiang tang arphew hajar ngut kaba mut ki phraphew hajar ngut ym lah pynbiang kali ban kit bad kane kan sa ktah ïa ka kam jngohkai pyrthei.
U la pynpaw ba ïa kane ka kam, dei ban leh suki suki ym dei ban shu kdiah jubor khnang ban ïa biang lang baroh bad ba kum ki nongshong shnong kiba ju im jakpoh da kane ka bynta ruh kin nang bteng ban ïoh ka kamai kajih.
U la ong ba ki nongjngohkai pyrthei ki ‘book online’ ïa ki kali ban leit sha ki jaka jngohkai pyrthei, ki ïoh beit na Assam. Kumta u la ai jingmut ba ïa kane ban shim wai kali ruh dei ban leh ruh ha Meghalaya ban suk ki nongjngohkai pyrthei.
