Nongpoh, Jylliew 30
Ki nongïalam jong ka Khasi Students’ Union (KSU) Central Executive Committee ha ka sngi Ba-ar ki la hiar sha Ri Bhoi ban kynduh ïa u Tourism Officer ka Ri Bhoi bad ruh ban jurip ïa ka Facilitation Centre ha Umling hadien ka jingïoh jingtip ba ka Sorkar Jylla kala thmu ban pynkylla ïa katei ka jaka kum ka dukan bam lane kata ka ‘food court’ bad kiwei-kiwei de.
Haba kren sha ki lad pathai khubor, u samla Pynkmenlang Sanmiet, Vice President ka KSU CEC u la ong, ka long kaba sngewsih ban ïohi ïa ka khubor ba ka Sorkar ka thmu ban pynkylla dukan bam ïa ka Facilitation Centre kaba la plie paidbah ha u snem 2020 na ka bynta ban peit pyrman ïa ka jingrung jingmih jong ki briew kiba nabar sha kane ka Jylla.
U la ong ruh kaba kham sngewsih shuh shuh ka dei ba ïa ka aiñ Meghalaya Residents Safety and Security Act (MRSSA) la dep ban pynlong aiñ naduh u snem 2016, hynrei shiphew snem hadien, kata haduh mynta, ka Sorkar kala pheil ban pyntreikam ïa kane ka aiñ bad kam pat lah ruh ban pynïeng ïa ka khyrdop peit pyrman lane kita ki Facilitation Centre ha kylleng ka Jylla.
U samla Pynkmenlang u la ong ruh ba watla u Myntri Rangbah ka Jylla, u Conrad K Sangma u la dep ban kren hapoh ka ïingdorbar thawaiñ ka Jylla ha u bnai Rymphang mynta u snem ba un wad ki lad ki lynti ban pyllait ïa kane ka aiñ MRSSA na ka jingbishar bniah ki aiñ (judicial scrutiny) ka Sorkar Jylla ne Sorkar India bad ban pynthikna ïa ka jingpynïeng noh ïa ki khyrdop Facilitation Centre ha kylleng ka Jylla, hynrei kaba pynsngewsih bad pynkthang ïa ka seng ka long ba wat ïa kane ka jaka kaba la angnud bad dep ban plie kum ka Facilitation Centre, la pynkylla pynban kum ka dukan bam.
Utei u nongïalam u la ong ruh ba ka seng hi kam pyrshah ban tei ïa ki dukan bam bad kiwei ki jingtei kiba ka Sorkar ka pynkhreh, hynrei kaei kaba ka seng ka kwah ka long ba ka Sorkar ka dei ban pynthikna shwa ba ka Facilitation Centre ka dei ban ïeng ha katei ka jaka lym kumta ka seng ka hap ban pynsangeh noh mardor ïa ka jingtei kaba dang ïaid shaphrang mynta.
Shuh shuh u la ong ruh ba na ka liang ka seng kan sa leit ruh ban kynduh ïa ki heh Sorkar ban pynsngew biang sha ki halor kane ka mat bad bynrap ba lada ka Sorkar ka ïaid shakhmat ban pyntrei ïa kane ka jingtei lyngba ka tnad Tourism, ka seng kam don eiei shuh ban ong, hynrei ai ba ka por kan sa batai bad ban sa peit kaei ka ban jia.
