Jowai, Jylliew 30
Ïa ka prokram Pulse Polio Immunization kaba lai sngi kynthih ha West Jaiñtia Hills District la plie paidbah da ka Emelya Ch Momin, Assistant Commissioner, Jowai kaba la ai dawai polio ruh sha ki khynnah ha Newhill Community Hall.
Ka Emelya Ch Momin, ha ka jingkren ka la ban jur ba watla ka ri India ka la lait na ka jingpang polio ha u snem 2014, hynrei ka jingma ban mih biang ka dang sah katba kane ka jingpang ka dang don ha ka pyrthei baroh kawei.
Ka la ban jur ruh ïa ka jingdonkam ban pynlong ïa kine ki prokram man ka por bad ka la kyntu ïa baroh ki kmie ki kpa kiba don ki khun kiba hapoh san snem ban pynthikna ba ki khun jong ki kin ïoh ïa ka dawai polio.
Ka Emelya ka la kyrpad ruh ïa ki nongshong shnong bad ki kmie ki kpa ban pynphriang ïa ka jingtip shaphang kane ka prokram bad ban kyrshan ïa ki nongtrei ka koit ka khiah bad ki kynhun ai dawai ha ka por ba ki leit jngoh ïa ki ïing ha kine ki sngi ban wan.
Hadien ka jingïalang, ka Emelya ha ryngkat u Waheh Shnong ka Dorbar Shnong New Hill bad kiwei-kiwei ki riew rangbah ki la ïashim bynta ha kaba ai dawai polio ïa ki khynnah kiba hapoh san snem ka rta.
Ïa ka jingïalang la pynïaid da ka Dr. P. Shylla District Medical & Health Officer, bad la ïoh ka jingkren na ka Dr. H.J. Uriah bad Dr. B. Sutnga, Paediatrician, MCH Panaliar.
