Shillong, Jylliew 30
U Myntri Rangbah ka Jylla un sa ïalam ïa ki nongïalam niam sha Delhi ban ïakynduh ïa u Amit Shah uba dei u Myntri ka tnad kam pohïing ban ïakren halor ka jingïarap pisa na shabar ri ne ka Foreign Contribution (regulation) Act.
Haba ïakren bad ki nongthoh khubor u Conrad K Sangma u la pyntip ba ha kine ki sngi ba la dep u la shong jingïalang bad ki katto katne ki kynhun nongïalam niam bapher-bapher ban buddien ïa ka mat ïakren kaba ki la dei ïakynduh ïa u Myntri kam pohïing ka Sorkar Pdeng u Amit Shah ha ka por ba u wan sha Shillong na ka bynta ban budien ïa ka Foreign Contribution (Regulation) Act.
U la ong ba ka Sorkar ka la pan ïa ka por ban ïakynduh ïa u Amit Shah sha Delhi ha ka taïew ba nyngkong u Naitung 2026.
Ha kajuh ka por u la ai jingmut ïa ki nongïalam niam ba kin ïakren ruh para ma ki hashwa ba kin ai jingmut ïa u Amit Shah.
Shuh-shuh u Myntri Rangbah ka Jylla u la pyntip ba ha ka jingleit jong u sha nongbah Delhi un leit ban ïakynduh ruh ïa u Myntri ka Sorkar Pdeng ba dei peit ïa ka tnad Road Transport & Highways u Nitin Gadkari, kumba u Myntri ka Sorkar Pdeng u la kular ban pyntrei ïa ka project ba thymmai hapoh ka Jylla, kum ka surok 4-Lane na Rilbong sha Barik bad na Umiam sha Shillong.
