Shillong, Jylliew 30
Ka Sorkar Jylla ka la thaw biang ïa 3 tylli ki Regional Committee ban khmih bniah halor ki jaka ba sah kiba dang don hapdeng ka jing-ïa-ka-jia bad ka Assam, ha kaba la bthah ruh ïa ki ban aiti ïa ki jinglap (jong ki) hapoh 45 sngi.
Ka jingpynbna ba la pynmih da u Chief Secretary, u Dr. Shakil P. Ahmed ha ka Sngi Ba-ar ka pynkylla ïa ka jingpynbna ba hashuwa kaba la pynmih ha ka 20 tarik u Lber, 2023.
Kine ki komiti kin eksamin ïa ka shnong Langpih ha West Khasi Hills; Borduar, Nongwah-Mawtamur, Deshdoomreah, Block-II ha Ri-Bhoi; bad Block-I, Psiar-Khanduli ha West Jaiñtia Hills.
U Symbud Myntri Rangbah ka Jylla, u Bah Prestone Tynsong un khlieh ïa ka komiti jong ka Ri-Bhoi, kaba kynthup ruh ïa u Myntri Sorkar, u Bah Sosthenes Sohtun bad Bah Mayralborn Syiem (MLA), u dkhot EM ka KHADC, Bah Denzil Raynard Chen, bad u Deputy Commissioner ka Ri-Bhoi kum u dkhot Convenor.
U Myntri ka tnad bording, u Bah Metbah Lyngdoh un long u Chairman jong ka komiti ka West Khasi Hills. Ki dkhot jong ka ki long u Myntri Sorkar, Bah Methodius Dkhar bad Bah R.L. Tongkhar (MLA), u MLA, Remington Gabil Momin, u CEM ka KHADC, Bah Winston Tony Lyngdoh, u MDC, u Bah Lurshai Kharbani, bad u DC ka West Khasi Hills kum u dkhot Convenor.
Ïa ka komiti ka West Jaiñtia Hills yn khlieh da u Symbud Myntri Rangbah ka Jylla, u Bah Sniawbhalang Dhar, ha ryngkat u Myntri ka tnad pule-puthi, u Bah Lakmen Rymbui, ki MLA, u Bah Comingone Ymbon bad u Bah Nujorki Sungoh, u CEM ka JHADC, u Bah Thombor Shiwat, u MDC, Bah Aiborlang Shadap, bad u DC ka West Jaiñtia Hills un long u dkhot Convenor.
Katkum ka jingpynbna, ki komiti ki hap ban ïatreilang bad ki Regional Committee ka Assam bad ban pynshisha ïa ki kyrteng jong ki shnong ba la kam da ka Meghalaya pyrshah ïa ki jingthoh ka Assam.
Kin pyntikna ruh ïa ka jaka bad ka jingïajan jong ki shnong, kin pule ïa ki jingthoh halor ka jingbun briew kynthup ïa ka jaidbynriew, bad ban pynkhreh ïa ka ‘As-Is’ Public Asset Register na ka bynta ki jingdon-jingem ba la thaw da baroh ar tylli ki Jylla.
Ki komiti ki hap ruh ban leit jngoh ïa baroh ki shnong bad ban ïakynduh bad ki nongshong shnong, ki nongmihkhmat ka ADC, lem bad kiwei-kiwei ki nongïashim bynta “ban tip shaphang ka jingsngew jong ki briew kiba sah ha kata ka thaiñ.”
Ha kajuh ka por, kin buh jingthoh ïa ka jingjngai kaba paw bad ka por ba la pyndonkam, na ki shnong sha ka jaka pdeng ai jingshakri paidbah ne ka Administrative Unit. Ki Deputy Commissioner jong ki distrik bapher-bapher kin ai ka jingkyrshan kaba donkam na ka liang jong ki.
U dkhot Convenor jong kawei-pa-kawei ka komiti un buh ïa ki tarik ban leit jngoh da kaba ïamir jingmut lang bad kiba na sha shiliang Assam.
“Ki komiti kin aiti ïa ka kaiphod jong ki sha ka Sorkar Meghalaya hapoh 45 sngi naduh ka tarik jong kane ka jingpynbna katkum ka jingjurip ïa ki shnong ki thaw bad katkum ki jingthew ba la mynjur lang jong ka jingïohi na ka liang ka histori, ka jaidbynriew jong ki nongshong shnong, ka jingsuk ha ka liang ka synshar-khadar jong ki trai shnong, ka jingïajan bad u pud u sam bad ka jingsngew jong ki briew kiba shong ba sah ha kata ka jaka,” ong ka jingpynbna.
