Shillong, Jylliew 30
U Myntri Rangbah ka Jylla u Conrad K Sangma ula ïathuh ba ka Jylla Maharashtra kala mynjur ban ai ïa ka jaka ban tei ïa ka Meghalaya House ba thymmai ha Navi Mumbai ha ka dor Sorkar ba T.7 klur ha ka jaka ka dor ïew ba T.90 klur.
Haba ïakren bad ki nongthoh khubor, u Conrad ula ong ba kine ki jingtei kin dei na ka bynta u paidbah ba kin shakri khamtam eh ïa ki samla pule, ki nongpang bad ki nongshongshnong kiba leit donkam sha kine ki sor metro.
“Ka Sorkar Maharashtra kala mynjur ban ai jaka ïa ka Sorkar Meghalaya ba kan tei ïa ka Meghalaya House. Ka jaka, kaba dang thymmai, ka don ïa ka dor ïew ba T.90 klur. Nga la kyrpad ïa u Myntri Rangbah ba lada u lah ban ai ïa katei ka jaka sha ngi ha ka dor Sorkar kaba long T. 7 klur” ong u Conrad.
U la ong ba ba kane ka jaka ba thymmai, kaba ïoh ha Maharashtra sha ka phang ka Navi Mumbai, kan long ka jingmyntoi kaba khraw ïa ki briew jong ka Jylla bad buh ïa ki jaka paidbah kiba heh ha katei ka jaka”.
U Myntri Rangbah ula pyntip ba ula bthah ïa ki ophisar ba kin pynleit jingmut halor ka jingpyndonkam u paidbah khnang ba kane ka Meghalaya House ka dei ban long na ka bynta u paidbah, ka ban ailad kham bun ïa ki samla pule, ki nongpang bad kiwei ki briew kiba donkam ïa ka jaka ba kin sah.
U Conrad ula ïathuh ha ka jingleit iuhkjat jong u dang shen sha Hyderabad, u la ïoh ban ïakynduh ïa u Myntri Rangbah ka Telangana bad u la thoh shithi ruh sha u ban kyrpad ïa u ba ka Sorkar Meghalaya kan ai jaka na ka bynta ka Meghalaya House ha Hyderabad, namar ka Hyderabad ka dei kawei ka sor metro bad ki don bun ki nongshong shnong jong ka Meghalaya ha katei ka sor.
“Nga sngewkmen ban pyntip sha phi ba u Myntri Rangbah ula mynjur ban ai jaka ïa ka Meghalaya ha Hyderabad ban tei ïa ka Meghalaya House ngin sa ïoh shen ïa ka jubab da ka jingthoh” ula ong.
Haba ai jingkheiñ ïa ki project ki ban nang wan, u Conrad u la ïathuh ba kin sa ïoh ïa ki Meghalaya House ba thymmai, nalor ka Greater Noida ha Uttar Pradesh bad ha Bangalore, ka jaka thymmai ha Navi Mumbai, ka jaka ha Hyderabad bad kin sa pyntrei ruh ïa ka Meghalaya House ba thymmai ha Vellore.
